سینیٹ، کل اسمبلی تا گچین کاری ءِ اسہ دے آ کننگ نا قرارداد منظور

اسلام آباد: سینیٹ قومی اسمبلی و ہر چار آ صوبائی اسمبلی تا گچین کاری تے اسہ جاگہ غا کرفنگ نا قرارداد نا گیشتری سلاہ اٹ منظوری ءِ تس۔ دوشنبے نادے آ سینیٹ اٹی دا رد اٹ سینیٹر طاہر بزنجو، عبدالغفور حیدری و فیصل سبزواری و ایلو باسک آک قاعدہ معطل کننگ و قرارداد پیش کننگ نا تحریک پیش کریر۔ ایوان تحریک نا منظوری ءِ تس اوکان پد سینیٹر طاہر بزنجو قرارداد پیش کرے۔ قرارداد اٹی پاننگانے کہ زرگزرانی سوگوی کن سیاسی سوگوی المی ءِ، ملک پین سیاسی نزوری ءِ سگنگ کپک۔ پنجاب ملک انا آبادی نا رداٹ غٹ آن بھلا ملک ءِ ہراڑے قومی اسمبلی نا غٹ آن زیات نشست ءُ، پنجاب اٹی اول گچین کاری تیان ایلو چنکا صوبہ غاتیا منفی اثرتمک۔ جنگ و جھیڑہ نا جاگہ غا سیاسی سوگوی نا گرج ءِ ہنداسوب آن قومی اسمبلی و ہرچار آ صوبائی اسمبلی تا اسہ وخت آ گچین کاری تے کرفنگے۔ قومی و صوبائی اسمبلی تا اسیجاگچین کاری تیان بنجاسوگو مریک۔ ایوان گیشتری سلاہ اٹ قرارداد نا منظوری ءِ تس۔ دا وخت آ چیئرمین سینیٹ قرارداد آ ایوان آن سلاہ ہلک‘ایوان اٹ ساڑی جماعت اسلامی نا سینیٹر مشتاق احمد خان دا وڑ اٹ قرارداد نا منظوری آ برانز کرسا پارے کہ حکومت آئین نا رد اٹ گچین کاری کرفے و گچین کاری تے اسہ دے آ کرفنگ کن ایلو صوبہ غاتے ٹی ہم حکومت آتے چٹفنگے۔ او حکومت آن خواست کرے کہ زو گچین کاری کرفنگ کن سیاسی واکدار آتا نیام اٹ مذاکرات کرفنگے‘ او قرارداد نا مخالفت ءِ کرے‘ دیوان نا وخت آ اپوزیشن لیڈر ڈاکٹر شہزاد وسیم پارے کہ اینو ایوان اٹ داڑیلی کننگانے‘ سپریم کورٹ پنجاب اٹ گچین کاری کرفنگ ناپرمان کرینے و حکومت داڑان نرنگ اٹی ءِ۔ اوپارے کہ اپوزیشن ندا ٹوکن واک آؤٹ نا وخت آ حکومت دا واردات ءِ کرے‘ او پارے کہ سینٹ نا دا ہال پاہک کہ پاکستان ءِ استخواہی تا جاگہ غا آئین نا وڑ اٹ چلیفنگے‘بڑزکوایوان اٹ اپوزیشن نا باسک آک دا قرار داد ءِ مسترد کیرہ ہرادے دزی اٹ ایوان اٹ پیش کننگانے و خواست کیرہ کہ سپریم کورٹ نا پرمان و آئین نا رد اٹ 14مئی آ گچین کاری کرفنے۔ اوپارے کہ داکان مست ہرا قرار داد پیش کننگاسس او ہم آئین نا خلاف ورزی ئس۔ دا وخت آ بنجائی وزیر سینیٹر اعظم نذیر تارڑ پارے کہ اپوزیشن ادب نا خیال ءِ کے اپوزیشن ہیت آتے بنپک و ایوان آن بائیکاٹ کیک۔ اوپارے کہ دا ایوان اٹ ساڑی 9پارلیمانی جماعت آتا سینیٹر آتا کنڈآن اسیجائی قرارداد پیش کننگا او پارے کہ اپوزیشن چلینگوک ءُ کارتوس اسے۔

(اے پی پی)