توشہ خانہ سرجم آتے پبلک کننگ نا فیصلہ نا برخلاف انٹراکورٹ اپیل

لاہور: لاہور ہائی کورٹ اٹی بنجائی حکومت توشہ خانہ نا سرجم آتے پبلک کننگ نا سنگل بنچ انا فیصلہ نا برخلاف انٹرا کورٹ اپیل دائر کرے۔ بنجائی حکومت سیکرٹری کیبنٹ ڈویژن نا کمک اٹ اپیل دائر کرینے۔ اپیل ایڈیشنل اٹارنی جنر ل لاہور ہائی کورٹ اٹی دائر کرے ہراٹی موقف اختیار کننگانے کہ عدالت عالیہ نا سنگل بنچ 1990 آن 2001 اسکان توشہ خانہ آن ہلوک آ ٹیکی تا سرجم آتے پبلک کننگ نا پرمان کرے، سنگل بنچ ٹیکی تروک آتا پن تے ہم پبلک کننگ نا پارت کرینے، ٹیکی تروک آ ملک آتا پن ءِ پبلک کننگ نا سنگل بنچ انا فیصلہ کانودی وڑاٹ سہی اف۔ ہنداسوب آن خواست کننگک کہ سنگل بنچ نا 1990 آن 2001 اسکان ناریکارڈ ءِ پبلک کننگ و ملک آتا پن تے پبلک کننگ نا فیصلہ ءِ کالعدم گوندنگے۔ یات سلے کہ تدوک آ تُو 22 مارچ آ لاہور ہائی کورٹ نا جسٹس عاصم حفیظ آ تالان سنگل بنچ درخواست گزار ہندی شاری منیر احمد نا درخواست آ 1990 آن 2001 اسکان توشہ خانہ نا سرجم آتے پبلک کننگ نا پرمان کریسس۔ درخواست اٹی پاکستان نا جوڑ مننگ آن داتم اسکان توشہ خانہ نا ٹیکی ہلوک آ شخصیت آتا سرجم آتا فراوانی نا خواست کننگاسس۔ عدالت عالیہ نا سنگل بنچ ریکارڈ ءِ مون آ اتپننگ نا بنجائی حکومت نااعتراض ءِ مسترد کرسا پرمان کرینے کہ ہرا سنگت ملک ٹیکی تس او فتا ہم پاننگے، اسہ گڑاسے ہم ڈکھنگ مفک، مچ آ ریکارڈ ءِ پبلک کننگے۔ بنجائی حکومت نا کنڈآن انٹراکورٹ اپیل آ جسٹس شاہد بلال حسن و جسٹس رضاقریشی آ تالان بنچ سماعت کیک۔

(اے پی پی)