تینا لائخی اٹ ہر بشخ اٹی پبی سرسہبی دوئی کرینن، صدر مملکت

اسلام آباد : صدر مملکت ڈاکٹر عارف علوی یوم پاکستان نا وخت آ مچ آ قوم ءِ مبارکبادی ترسا پارینے کہ 1940 اٹی اینو نادے برصغیر نا مسلمانک قرارداد ءِ پاکستان منظور کریر و اسہ جتا ءُ وطن اسے نا خواست کریر کہ ہراڑے او اسلامی نظریہ غاتا رداٹ آجوئی اٹ تینا زند ءِ تیر کننگ کیر۔ صدر مملکت یوم پاکستان 23 مارچ 2023نا وخت آ قوم انا پن تینا کلہو اٹی پارے کہ اینو نن بانیانِ پاکستان ہرافتا جہد و قربانی تا سوب آن پاکستان جوڑ مس، ءِ خراج عقیدت پیش کینہ۔ اوپارے کہ بھارت اٹی اقلیت، خاص وڑاٹ، مسلمان تیا ظلم و ستم، ہندو توا نا ودوک آ چرجوئی و مسلمان تا برخلاف بیدادی، انسانی حق انا خلا ف ورزی، و غیرکانودی وڑاٹ بھارت نا کوزہ ٹی جموں وکشمیر اٹی بھارتی سیکورٹی فور س آتا کنڈآن برجا ظلم داہیت انا شاہدی ءِ کہ ہمووخت انا مسلم سرکڑدہ غاک اسہ دانشمندانہ فیصلہ اس کریسر۔ ڈاکٹر عارف علوی پارے کہ دادے بحیثیت قوم ننے تینا سرسہبی و بے سہبی تا جاچ ءِ ہلنگ نا ہم یات دہانی کرفک، آجوئی نا وخت ننے مہاجر آتا آبادکاری و بحالی، نوزائیدہ ریاست نا آئینی و بست و بند ویل، سلامتی ناخطرہ، پوسکن آریاست ءِ سوگو راجی، اقتصادی و صنعتی بنداو تیا استوار کننگ و جموں وکشمیر نا جھیڑہ کون آ بھاز انگا چیلنج آتا مون تروک ئس۔ دا چیلنج آتیان پد ہم نن تینا پدریسہ خواری و قابلیت اٹ ہربشخ اٹی شاندار سرسہبی دوئی کرین۔اوپارے کہ نن ریاستی ادارہ جوڑ کرین، تینا دفاع ءِ بھاز سوگو کرینن، جوہری لائخی دوئی کرین، دہشت گردی و کورونا دین انا مون ءِ تورین و قدرتی آفت آتیٹی قربانی و کمکاری نا جوزہ نا درشانی ءِ کرین۔ صدر مملکت پارے کہ ننے کانود نا حکمرانی ءِ پک کننگ، جمہوریت ءِ سوگو کننگ، تینا راج اٹ بے بریبری ءِ کم کننگ، زالبول آتے واکدار کننگ، خصوصی بندغ آتا حق انا فراوانی، دہشت گردی و انتہاپسندی نا چٹفنگ، تینا شاری تا انسانی حق انا رکھ ءِ کننگ وملک اٹ سیاسی و زرگزرانی سوگوی ءِ پک کننگ کن داسکان پین کاریم کروئی ءِ۔ اوپارے کہ مستین اٹ ننا سرسہبی تے مون آ تخسا کنا پکا یقین ءِ کہ نن پاکستان ءِ مون تروک چیلنج آتا مون ءِ توننگ نا پورو لائخی تخنہ۔ صدر مملکت پارے کہ اگہ نن سیوت، ایمان و نظم و ضبط اتون کاریم کرسا کین تو نن پاکستان ءِ اسہ سوگو و شونہال ملک اس جوڑ کننگ کینہ۔ اللہ تعالیٰ ننا غٹ انا حامی و ناصر مرے۔

(اے پی پی)