23 مارچ نا دے کل پاکستانی تے کن گمر نا ہیت اسے، قدوس بزنجو

کوئٹہ : وزیراعلیٰ بلوچستان میر عبدالقدوس بزنجو پارینے کہ پاکستان اِرا قومی نظریہ غا جوڑ مس و داڑے آباد کل اقلیت آتے پورو حق و مچ آن مچ مذہبی آجوئی دوئی ءِ‘ پاکستان نا بنداو کلمہ توحید ءِ و پاکستان اسلام نا اسہ سوگو ءُ قلعہ اسے۔ 23 مارچ 1940ء برصغیر نا تاریخ نا اسہ ہندن ءُ عظیم ءُ دے اسے ہرا کل پاکستانیک گمرکیرہ کہ دا دے آ قرارداد پاکستان پیش کننگا ہراکہ ہند انا مسلمان تا پاکستان نا دوئی کننگ کن جہد انا مزل نا نشان پک مس۔ یوم پاکستان آ تینا جاری کروک کلہو اٹ وزیراعلیٰ پارے کہ اینو نا دے قائد نا تدبر و اقبال نا فکر انا اسیجائی درشانی ءِ۔ دا اسہ عظیم ءُ دے اسے دا دے آ ہند انا مسلمانک تینا منزل ءِ پک کریر وبانی پاکستان قائداعظم محمدعلی جناح نا فہم و فراست، سوگویقین، سیاسی تدبر و عملی جہد انا پورو مخ تفی و تائید کریر‘ ہرافک مسلمان تے اقلیت آخا بلکہ اسہ جتاءُ قوم اس گوندار ہرا جتاءُ حیثیت اسے ٹی درست مریک و ہرا دن ءُ اسہ آئین اسے ہم امنا کپک ہرا ہندوستان نا مسلمان تا حق آتیان چپ مرے‘ دانا عملی دروشم 1945 نا گچین کاریک ئسر ہرافتے ٹی مسلمان تے پیدوار ءُ سیاسی گیشتری اس دوئی مس۔ وزیراعلیٰ پارے کہ قرارداد پاکستان دنیا نا نقشہ غا اسہ جتاءُ مسلمان ریاست نا جوڑ کننگ نابنداو و داڑے آباد جتاجتا قوم و اکائی تا حق آتے پک کننگ و رکھ انا ضمانت فراوان کیک۔ وزیراعلیٰ پارے کہ اینو نا دے دا عہد انا تجدید نادے ہم ارے کہ اینو نن تینا پاک وطن نا رکھ‘ سوگوی و شونداری کن ہر وڑ انا قربانی ایتنہ و دا مسخت کن سیوتی قوم آنبار تینا کل لائخی تے کاریم اٹ اتینہ۔ وزیراعلیٰ پارے کہ داوخت آ ننے ہرا چیلنج آک مون تروک ءُ دافتتون مون تننگ کن ہم نن اسہ پامدار‘ سیوتی و ذمہ دار قوم اسے نا وڑ اٹ جندی وجم وڑ اٹ تینا زمواری تے پورو کروئی مریک۔ اوپارے کہ بلوچستان نا الس وطن ءِ و او پاکستان و پاک فوج انا برخلاف پیشن نا پروپیگنڈہ غا کاریم کپک۔ اوپارے کہ دا وخت آ ملک ءِ سنت وسیوت ناگرج ءِ و ننا ملک پیشن نا پاکستان مخالف سرجز آتا سوب آن بے چیٹی ءِ سگنگ کپک‘ او الس آن خواست کرے کہ تینا سنت وسیوت کیر۔ وزیراعلیٰ دعا کرے کہ اللہ تعالیٰ پاکستان ءِ دشمن تیان رکھے و دا ملک قیامت اسکان سلے۔

(خ ن)