ہُرے پہ زُو کنے مرتضیٰ بھٹو آنبار کسفرہ، عمران خان

لاہور : پاکستان تحریک انصاف نا چیئرمین و مسکوہی وزیراعظم عمران خان پارینے کہ اینو یا پگہ کنے مرتضیٰ بھٹو آنبار کسفنگک‘ زمان پارک آ ہندن جلہو کننگا دُنکہ ہموڑے دہشتگرد آک ڈکوک مریر، کیس تے ٹی کنے تینکن آخا کارندہ غاتیکن گڑتی ارے‘ ہفتہ نا نن مینارپاکستان آ جلسہ مریک ہراکہ امپورٹڈحکومت نا برخلاف ریفرنڈم پک مریک‘ اخس پیسہ آئی ایم ایف آن ہلوئی ءِ ہموکان زیات دافتا جند انا پیسہ غاک پیشن تخوک ءُ‘ سینٹ اٹ اسحاق ڈار نیوکلیئر پروگرام ءِ آئی ایم ایف تون گنڈا‘ جوڈیشل کمپلیکس اٹ کنے خلنگ ناپورو پلان تیار ئس‘ چار درسَد پی ٹی آئی نا کارندہ غاک ئسر ایلو کل نادرست بندغ ئسر۔ آئی جی پنجاب و آئی جی اسلام آباد 2 اسکواڈ جوڑ کرینو ہراف ننا بندغ آتے ٹی اوار مرسا پولیس والاتیا سم کاری کیرہ۔ دافک ماڈل ٹاؤن آنبار کشت وخون کرفنگ خوارہ‘ دافک اخس کہ خار ایتر ولے کارندہ غاک صبر آن کاریم ہلیر‘ وارنٹ تون اوار بسر تو اوفتے توننگپ‘ ای دزگیری تننگ کن تیار اٹ ولے تینا بندغ آتے کہنگ کن الیپرہ‘ کنے تینا کیس تا آخا کارندہ غاتا فکر ءِ‘ عمران خان پارے کہ ہفتہ نا نن مینار پاکستان آ ہر حال اٹ جلسہ مریک‘ حکمران تا پیسہ غاک پیشن تخوک ءُ ہرافک آئی ایم ایف آن ہلوک پیسہ غاتیان زیات ءُ‘ او پارے کہ سینٹ اٹ اسحاق ڈار ہم نیوکلیئرپروگرام ءِ آئی ایم ایف تون گنڈا‘ الس آن ویڈیو لنک آ تران نا وخت آ عمران خان پارے کہ کنے آ ہر وڑ انا کیس جوڑ کننگانے‘ ملکی تاریخ نا کل مقدمہ غاتا ریکارڈ ءِ پرغانٹ‘ ننا کارندہ غاتے دزگیر کننگ انگ ءِ‘ ہندن کریک ڈاؤن کننگ انگ ءِ ہرانا جمہوریت اٹ درور رسینگپک۔ پرویز مشرف نا مارشل لاء ءِ خنان‘ وخت اس ہم دا وڑ انا کریک ڈاؤن خنتون‘ ننے آ جلہو مننگ اٹی ءِ و کیس ہم ننے آ جوڑ کننگ انگ ءِ‘ دا ہندن نشان تننگ اٹی ءُ کس پاہے پی ٹی آئی بھاز خطرناک ءُ جماعت اسے۔ عمران خان پارے کہ او اڑاند جوڑ کریر و ای اسلام آباد نا عدالت اٹ پیش مننگ کتوٹ۔

(آن لائن)