بلوچستان اٹی قبائلی جھیڑہ غاتے قبائلی روایت آتا رِد اٹ ایسر کینہ،وزیراعلیٰ میر سرفراز بگٹی

ڈیرہ بگٹی، وزیراعلیٰ بلوچستان میر سرفراز بگٹی پارینے کہ قبائلی جھیڑہ غاتے قبائلی روایت آتا رِد اٹ ایسر کینہ وخت اس کہ دہشت گردی نا برخلاف جنگ ءِ قبائلی یا قومی جنگ پاننگپک‘ او پارے کہ بروک آ سال ہمو علاقہ غاتے خصوصی اولیت تننگک ہراڑے مستین نا دور تیٹی شونداری کاریم متنے و کل علاقہ غاتے و الس ءِ بریبری نا اہمیت تننگک۔ ڈیرہ بگٹی ٹی صحافی تتون ہیت وگپ کرسا وزیراعلیٰ بلوچستان میر سرفراز بگٹی پارے کہ مستین اٹی بڑزکو عہدہ غاتیا مروک منہ بندغ آک تینا علاقہ و بندغ آتے گوجالار ولے ساڑی حکومت نا اولیت آتیٹی کل علاقہ و الس بریبری نا وڑ اٹ ءُ و شونداری عمل اٹی کس اتون ہم امتیازی سلوک کننگپک۔ وزیراعلیٰ بلوچستان پارے کہ کنٹریکٹ استاد آتا میرٹ آ بھرتی تا سوب آن صوبہ نا 99 درسد اسکول فعال مسنو۔ حکومت کنٹریکٹ بھرتی مروک استاد و ایلو ملازم آتے کن پنشن اسکیم درستی راستی کرفنگ نا ارادہ ہم تخک تاکہ اوفتا آخبت ءِ رکھوک جوڑ کننگ مرے۔ میر سرفراز بگٹی پارے کہ بلوچستان حکومت نا کنڈ آن جانجوڑی و تعلیم نا بشخ آتیٹی درستی راستی کرفوک اصلاحات آتے ایشیا و یورپ اٹی درور نا وڑ اٹ پیش کننگ انگ ءِ۔ او دعویٰ کرے کہ نئے بیرہ پاکستان بلکہ مچ آ دنیا ٹی حکومت بلوچستان نا اصلاحات آتاستاءِ کننگ انگ ءِ۔ وزیراعلیٰ مستی پارے کہ حکومت صوبہ ٹی امن و ایمنی‘ قبائلی جھیڑہ غاتا مدامگی ایسری، تعلیم و جانجوڑی نا گچینی و محروم علاقہ غاتا شونداری کن گام گیج برجا تخک۔ او پارے کہ الس ءِ بنداوی آسراتی تا فراوانی و کل علاقہ غاتا بریبر شونداری حکومت نا اولیکو اولیت آتیٹی اوار ءِ۔