نوکاپ آن زہمی آ تعلیمی ادارہ غاتے فعال کنننگک‘ ڈی سی جھل مگسی

جھل مگسی : ڈپٹی کمشنر جھل مگسی فلائیٹ لیفٹیننٹ (ر) یاسر حسین نا کماشی ٹی ضلع جھل مگسی نا تعلیمی ادارہ غاتے فعال کننگ نا بابت اٹ اسہ اہم ءُ دیوان اس اڈ ہلک۔ دیوان اٹ ڈسٹرکٹ ایجوکیشن آفیسر جھل مگسی عبدالستار لانگو، ڈسٹرکٹ مانیٹرنگ آفیسر عبدالعزیز لاشاری، یونیسیف نا نمائندہ عامر اقبال زہری و ایلو محکمہ تعلیم نا افسرک بشخ ہلکر۔ ڈسٹرکٹ ایجوکیشن آفیسر عبدالستار لانگو و ایلو افسرک ڈپٹی کمشنر جھل مگسی ءِ ضلع نا تعلیمی پس منظر، غیر حاضر استاد، تعلیمی ہند آتا خرابی و ایلو ویل آتا بابت کل حالیت آتیان معلومدار کرے۔ یونیسیف نا نمائندہ بریفنگ اٹ پارینے کہ نوکاپ و بشام نا پدریسہ پر تا سوب آن ضلع جھل مگسی نا تعلیمی ادارہ غاتے بھاز نسخان سر کرینے۔ ہرانا جوڑی کن یونیسف نا کنڈآن اسکول ڈیولپمنٹ پروگرام جوڑ کرسا ہنگامی بنداو آ مچ آ ضلع نا 20 اسکول آتا جوڑی نا کاریم بیرہ ساف وڑاٹ پورو مسنے۔ و آخبت اٹ پین یونیسیف نا کنڈآن اسکول آتا جوڑی و ایلو تعلیمی کاریم تا بنا ءِ کننگے۔ ڈپٹی کمشنر جھل مگسی فلائیٹ لیفٹیننٹ (ر) یاسر حسین دیوان نا بشخندار آتیان تران کرسا پارینے کہ اسکول نا جوڑی نا کاریم ءِ چیک اینڈ بیلنس کن مانیٹرنگ ٹیم اس جوڑ کننگ تون اوار اوار ڈسٹرکٹ مانیٹرنگ آفیسر عبدالعزیز لاشاری ءِ پارت کرسا پارینے کہ مچ آ ضلع نا فعال و غیر فعال اسکول و غیر حاضر استاد آتا جامع رپورٹ اس جوڑ کرسا دفتر اٹ زوت اس پیش کننگ نا پارت کرے۔ ڈپٹی کمشنر پارینے کہ تمام تعلیمی ادارہ غاتے فعال کننگے۔ اسکول آتا استاد و ایلو کمامدار آک حاضر مریر۔

(خ ن)