گچین کاری تاریخ نا دمدستی پڑو کننگے، صدر علوی

اسلام آباد: صدر مملکت ڈاکٹر عارف علوی پنجاب وخیبرپختونخوا نا صوبائی اسمبلی تا گچین کاری تا بابت چیف الیکشن کمشنر ءِ چٹھی اس مون تس۔ چٹھی ٹی الیکشن کمیشن ءِ پاننگانے کہ او الیکشن ایکٹ 2017 نا رداٹ صوبائی اسمبلی تا گچین کاری تا تاریخ نا دمدستی پڑو ءِ کے۔ صدر مملکت پارے کہ پنجاب و کے پی کے صوبائی گچین کاری تتون اوار اوار آخبت نا لس گچین کاری تا بابت خطرناک قیاس آرائی تیا تالان پروپیگنڈا ءِ چٹفنگ کن پنجاب وخیبرپختونخوا نا صوبائی اسمبلی تیکن گچین کاری شیڈول جاری کننگ المی ءِ۔ ایوان صدر نا پریس ونگ انا رداٹ صدر مملکت چیف الیکشن کمشنر ءِ نوشتہ کروک آ تینا چٹھی ٹی پنجاب و خیبرپختونخوا نا صوبائی اسمبلی تا تحلیل نا حوالہ ءِ تس و پارے کہ آئین نا آرٹیکل (2)224اٹی اسمبلی نا تحلیل آن پد 90 دے اٹی گچین کاری تا اڈتننگ آ زور شاغنگانے۔ اومستی پارے کہ آئین نا پارٹ VIIIنا رداٹ گچین کاری تا اڈتننگ الیکشن کمیشن نا بنداوی و المی فرض ءِ، خاص وڑاٹ آرٹیکل (3)218ای سی پی ءِ دا فرض ءِ تفویض کرینے کہ او شفاف و آجو گچین کاری تا اڈتننگ ءِ پک کے۔ اوپارے کہ دا الیکشن کمیشن ءِ ہرا گچین کاری تا بابت تینا فرض ءِ ادا کننگ اٹ بے سہب مننگ نا رند اٹ ملک انا آئین نا خلاف ورزی نا زموار و جوابدہ گوندنگک۔ صدر آئین نا آرٹیکل 42 و تھرڈ شیڈول نا حوالہ ءِ ترسا زور شاغا کہ سروک مملکت مننگ نا حیثیت اٹ او ”آئین نا رکھ و دفاع“ نا سوغند ہرفینے۔ او چیف الیکشن کمشنر و الیکشن کمیشن نا باسک آتے آئین نا آرٹیکل 214 و تھرڈ شیڈول نا رداٹ اوفتا سوغند نا رداٹ بنداوی زمواری نا بارواٹی یات ترفے ہراٹی پاننگانے کہ ”ای تینا زمواری تے پورو ایمانداری اتون اسلامی جمہوریہ پاکستان نا آئین نا رداٹ ادا کیوہ“۔ آئین و الیکشنز ایکٹ 2017 نا خلاف ورزی نا نتیجہ غاتیان بچنگ کن ہڑتوم آ تحلیل مروک اسمبلی تا گچین کاری شیڈول نا دمدستی پڑو ءِ کننگے۔ صدر مملکت چٹھی ٹی آئین نا تمہید/قرارداد مسخت آتا اہمیت ءِ مون آ تخسا پارے کہ تمہید اٹی گیر مبہم لوز آتیٹی پاننگانے کہ ”ریاست تینا طاقت و اختیار ءِ الس نا گچین نمائندہ غاتا کمک اٹ کاریم اٹ اتیک“۔ دا قوم انا آباؤ و اجداد نا بدل مفروک عزم انا ڈیک ءِ ہراقرارداد مسخت آتا مسودہ تیار کرے ہرادے آئین نا (آرٹیکل A2) بشخ جوڑ کننگا۔ ہندا وڑ آئین اٹی جمہوری اصول و قدر انا پیروی و پابندی نا بارواٹی ہچ ءُ ابہام اس پین سلپک۔

(اے پی پی)