کنا مار قافلہ ٹی تنیا اَلو، 30 آن زیات متبر ہم ئسر، وزیراعلیٰ

کوئٹہ(آن لائن)وزیراعلیٰ بلوچستان جام کمال خان پارینے کہ کنا مار انا قافلہ ٹی لسبیلہ نا 30 آن زیات متبر اوار ئسر، ہرا مہمانی و ہڑزخواہی کن ہنارہ۔ قافلہ ٹی بیرہ اِرا موبائل سیکورٹی کن ئسرہ، اگہ سیکورٹی نا خلیس متوکہ تو اِرا موبائل ہم متوسہ۔ دا بیان ءِ او تدوک آ دے راجی رابطہ نا ویب سائٹ ٹویٹر آ تینا کلہو اٹی تدوک آ دے لسبیلہ ٹی مار انا قافلہ نا بابت وضاحت کرسا تسنے۔ او سینئر صحافی سلیم صافی تون ہیت کرسا پارے کہ نی ہم ہرا گاڈی تے خنانس، اوفتیٹی پولیس نا 4 گاڈی ئسرہ، ہرافتیان بیرہ 2 موبائل اوڑتون ئسرہ، و ایلو 2 موبائل ہموعلاقہ نا ئسرہ، ہرا پروگرام ئس، کنا مار، برازات و لسبیلہ نا ایلو بھاز آ بھلا بندغ آک ہڑزخواہی و اسہ مہمانی سے آ دوریجی و لوہی آ ہناسر۔ او پارے کہ ایلو گاڈیک اسکواڈ یا موبائل اَلوسہ، بلکہ لسبیلہ علاقہ نا 30 آن زیات متبر آتا ئسرہ، ہرا دا مہمانی و ہڑزخواہی آ ہنارہ، اوہم تینا گاڈی تیٹی۔ او پارے کہ اگہ سکیورٹی نا سوب متوکہ تو ان شا اللہ دا 2موبائل ہم متوسہ۔