قومی کرکٹ ٹیم انا سرسہبی مچ آ ملک اٹی کرکٹ نا شوقی تے خوش کرینے،وزیرِ اعلیٰ میر سرفراز بگٹی

کوئٹہ، وزیر اعلیٰ بلوچستان میر سرفراز بگٹی انگلینڈ نا برخلاف اسہ وکٹ اسے اٹ سرسہبی دوئی کننگ آ قومی کرکٹ ٹیم ءِ مبارکبادی ترسا پارینے کہ پاکستانی گوازی گرک مشکل حالیت آتیٹی بے کچ حوصلہ، چاہنداری و آخریکو ساہت اسکان مقابلہ کننگ نا جوزہ نا درشانی ءِ کریر۔ وزیرِاعلیٰ ہاؤس نا سیکرٹریٹ آفس آن جاری کروک بیان اٹی او پارے کہ سخت مقابلہ ٹی قومی ٹیم انا سرسہبی گوازی گرآتا خواری، ارادگی و ٹیم ورک انا بھرم ءِ۔ زور آن پد ہم پت و یکسوئی اٹ گوازی ءِ برجاتخنگ قومی گوازی گرآتا لائخی تا شاہدی ءِ۔ میر سرفراز بگٹی شاداب خان نا سنچری نا ستاءِ کرسا پارے کہ اونا جوان اننگز پاکستان نا سرسہبی ٹی اہم کڑد ادا کرے وخت اس کہ حارث رؤف تون آخریکو وکٹ آ فیصلہ ئی شریداری میچ انا رخ ءِ بدل کرسا قومی ٹیم ءِ یاتگار سرسہبی تس۔ وزیرِاعلیٰ بلوچستان پارے کہ قومی کرکٹ ٹیم انا داسرسہبی مچ آ ملک اٹی کرکٹ نا شونقی تے خوش کرینے۔ گوازی نامیدان اٹی گوازی گر تا جوزہ، سوگو سلنگ و واجتماعی جہد ورناتے کن اسہ مثبت ءُ درور اسے و دا کلہو ءِ ایتک کہ مشکل حالیت آتیٹی حوصلہ ءِ برجا تخسا سرسہبی دوئی کننگ مریک۔ او سہ ملکی کرکٹ سیریز اٹی قومی ٹیم انا جم کارکڑد انا ہم ستاءِ کرسا پارے کہ گوازی گر تا خواری، کسبی چاہنداری و تین پہ تینی ہم گرنچی پاکستان کرکٹ اکن است بڈی ناسوب ءِ۔ اومیت ءِ کہ قومی ٹیم بروک آ مقابلہ غاتیٹی ہم ہنداجوزہ و خواری اٹ تینا کارکڑد نا ریسہ ءِ برجا تخک۔ وزیرِاعلیٰ میر سرفراز بگٹی پاکستان کرکٹ بورڈ انا چیئرمین محسن نقوی وقومی کرکٹ ٹیم انا گوازی گر تے کن نیک است خواہی نا درشانی ءِ کرسا اومیت درشان کرے کہ پاکستانی ٹیم آخبت اٹی ہم ملک انا پن ءِ روشنا کیک۔