وزیر داخلہ نا کماشی ٹی دیوان، پشین اٹی دفعہ 144 نافذ کننگ نا فیصلہ

کوئٹہ، وزیر داخلہ بلوچستان میر ضیاء اللہ لانگو نا کماشی ٹی پشین اٹی امن و ایمنی نا حالیت تون تعلقدار اہم ءُ دیوان اس اڈ ہلک، ہراٹی ضلع اٹی امن وایمنی ءِ برجا تخنگ، الس نا جان و مال انا رکھ و ڈوہدار آتا برخلاف کارروائی تے پین ترند کننگ نا باندات آ جم سجفنگا۔ دیوان اٹی ضلع پشین اٹی دمدستی وڑ اٹ دفعہ 144 نافذ کننگ نا فیصلہ ہم کننگا۔ دیوان اٹی چیئرمین پبلک اکاؤنٹس کمیٹی اصغر ترین، صوبائی اسمبلی نا باسک سید ظفر آغا و اسفندیار کاکڑ، ایڈیشنل چیف سیکرٹری داخلہ حمزہ شفقات، کمشنر پشین ڈویژن، ڈی آئی جی پشین، ڈی پی او و ایلو تعلقدار کمامدار آک بشخ ہلکر۔ دا وخت آ پشین نا قبائلی متبر و عالم دینک ہم ساڑی ئسر۔ دیوان نا وخت آ تعلقدار کمامدار آک وزیر داخلہ بلوچستان ءِ پشین اٹی امن و ایمنی نا جم حالیت، سیکورٹی بست وبند و مون تروک چیلنج آتا بابت جم بریفنگ تسر۔