بلوچستان،28 محکمہ ٹی ای فائلنگ آن پد سمری تا ڈیجیٹلائزیشن نا ہم بنا

کوئٹہ، وزیراعلیٰ بلوچستان میر سرفراز بگٹی نا کماشی ٹی سرکاری خذمت آتا فراوانی ٹی گچینی و ڈیجیٹل اصلاحات نا بابت اہم دیوان اس اڈہلک‘ ہراٹی صوبہ نا سرکاری محکمہ غاتیٹی ڈیجیٹل نظام نا نافذ کننگ و انتظامی باندات ءِ پوسکن آ وڑتتون ہم گرنچ کننگ اٹی مروک آ پیشرفت نا جاچ ءِ ہلنگا۔ دیوان ءِ پاننگا کہ بلوچستان نا 28 سرکاری محکمہ غاتیٹی ای فائلنگ نا نظام نا رداٹ اسہ لکھ 83 ہزار آن زیات ای فائل آتے سرتننگانے، وخت اس کہ سرکاری باندات آتے ٹی پین ترندی، شفافیت و گچین فیصلہ سازی کن سمری تاڈیجیٹلائزیشن نا عمل ناہم بناءِ کننگانے۔ بنائی ریسہ ٹی 10 سرکاری محکمہ غاتا سمری تے ڈیجیٹل نظام آ گدریفنگ نا بناءِ کننگانے۔ وزیراعلیٰ میر سرفراز بگٹی پارت کرینے کہ سرکاری باندات آتے پوسکن ڈیجیٹل نظام آ گدریفنگ نا عمل اٹی پین ترندی اتنگے و کل تعلقدار محکمہ غاک دا رداٹ تینا زمواری تے گچین وڑاٹ سر ایتر۔ او پارے کہ سرکاری باندات آتے ٹی بے گرج ہُرے کننگ ءِ چٹفنگ و وخت آ فیصلہ غاتے پک کننگ المی ءِ تانکہ انتظامی باندات آتے زیات گچین و بھرم تروک جوڑ کننگ مرے۔ وزیراعلیٰ پارے کہ ڈیجیٹل گورننس بیرہ ٹیکنالوجی نا کاریم اٹ اتنگ نا پن اف بلکن دا سرکاری نظام اٹ شفافیت، ترندی و پرسجو ءِ مون آ دننگ نا اسہ گچین ءُ وڑ اسے۔ پوسکن آٹیکنالوجی نا کمک اٹ سرکاری باندات آتا سرتننگ اٹی گچینی اتنگ آن نئے بیرہ انتظامی کارکڑداٹی ودکی مریک بلکن الس ءِ ہم گچین و وخت آ خذمت فراوان کننگ مریک۔ میر سرفراز بگٹی پارے کہ حکومتی کارکڑد ءِ گچین کننگ کن روایتی وڑوڈول نا جاگہ غا گچین و پوسکن ڈیجیٹل نظام ءِ تینا کننگ وخت انا اہم گرج ءِ۔ سرکاری فائل و سمری تا ڈیجیٹلائزیشن آن فیصلہ سازی نا عمل ءِ ترند کننگ، بے گرج ہُرے ءِ کم کننگ و سرکاری باندات آتا چاروکی ءِ گچین کننگ اٹ کمک رسینگک۔ وزیراعلیٰ بلوچستان پارت کرینے کہ ڈیجیٹلائزیشن نا عمل اٹ کل تعلقدار محکمہ غاتا نیام اٹ گچین رابطہ کاری و کمکاری ءِ پک کننگے تانکہ اصلاحاتی گام گیج آتے پک ہدف آتا رداٹ مون آ دننگ مرے۔ او دا عزم انا درشانی ءِ کرینے کہ پوسکن آ ٹیکنالوجی نا گچین کاریم اٹ اتنگ نا کمک اٹ صوبائی انتظامی نظام ءِ پین شفاف، فعال و السی گرج آتتون ہم گرنچ کننگک۔