پاکستان کشاری پیداوار و ٹیکنالوجی نا بشخ آتیٹی گیشتر لائخی تخک،جام کمال خان

دوحہ، بنجائی وزیر واپارجام کمال خان پارینے کہ پاکستان نا کسبکار ہیومن ریسورس قطر نا زرگزرانی شونداری ٹی اہم کڑد ادا کننگ کیک، پاکستان کشاری پیداوار و ٹیکنالوجی نا بشخ آتیٹی گیشتر لائخی تخک۔ دا خیال آتا درشانیءِ او قطر نا دارالحکومت دوحہ ٹی جہانی زرکاری فورم 2026 آن تران اٹی کرے۔ وزارت واپار نا رداٹ جام کمال خان پارینے کہ پاکستان نا کسبکار ہیومن ریسورس قطر نا زرگزرانی شونداری ٹی اہم کڑد ادا کننگ کیک، پاکستان کشاری پیداوار و ٹیکنالوجی نا بشخ آتیٹی گیشتر لائخی تخک۔ او قطر بزنس مین ایسوسی ایشن نا چیئرمین شیخ فیصل بن قاسم الثانی تون ہم اوڑدہی کرے ہراٹی پاک قطر واپاری و اقتصادی کمکاری ودفنگ نا بارو اٹ گپ وتران کرے۔ ہڑتوم آ کنڈ آن آئی ٹی، لاجسٹکس، کشت وکشارو غذائی رکھ اٹی کمکاری ءِ ودفنگ آزور شاغنگا۔ وزیر واپار قطری زرکار آتے پاکستان اٹی زرکاری نا سلہ خلک، فریق آک کاروباری برادری تا نیام اٹ دراست رابطہ غاتے ودفنگ آ ہم امنا کریر۔ جام کمال خان حساد فوڈ انا چیف ایگزیکٹو علی ہلال الکواری تون ہم اوڑدہی کرے ہراٹی کشت وکشار، غذائی رکھ و کشاری واپار اٹی کمکاری ءِ ودفنگ نابارو اٹ گپ وتران کرے وخت اس کہ کشاری سپلائی چین و مریس مدی واپاری شریداری آ ہم سجفنگا۔ وزیر واپار پارینے کہ پاکستان قطر ءِ آب اٹو کشاری گڑا فراوان کننگ نا پورو لائخی تخک۔ او حساد فوڈ ءِ کراچی ٹی فوڈ ایگ 2026 اٹی بشخ ہلنگ نا سلہ ہم خلک۔ بنجائی وزیر ترکیہ نا نائب وزیر واپارمصطفی توزجو تون ہم اوڑدہی کرے ہراٹی پاک ترکیہ ہڑتوم آ کنڈآتا واپارو زرکاری ءِ ودفنگ نا بارواٹ گپ وتران کننگا۔ ہڑتوم آ سرکڑدہ غاک کشت وکشار، غذائی رکھ، توانائی، معدنیات اٹی تین پہ تینی کمکاری ءِ ودفنگ آ زور شاغار و صنعت و ٹیکنالوجی نا بشخ آتیٹی کمکاری آہم گپ وتران کریر۔ فریق آک علاقائی رابطہ و واپاری راہداری تے گچین جوڑ کننگ نا اہمیت آ امنا کریر۔ جام کمال خان پارے کہ گچین واپاری رابطہ غان ہڑتوم آ ملک آتا منڈی تسکان رسینگ اٹی ودکی مریک۔ او ترک زرکار آتے پاکستان نا معدنیات آتتون اوار اولیتی بشخ آتیٹی زرکاری نا ہم سلہ خلک۔ فریق آک اقتصادی تعلقداری تے سوگو کننگ کن پدریسہ گپ وتران و عملی کمکاری ءِ برجا تخنگ آ امنا کریر۔