گچین کاری پد بٹنگ نا کیس، عدالت نا لارجر بینچ پنا

اسلام آباد: سپریم کورٹ نا پنچ باسکی بینچ اٹ اوار جسٹس امین الدین اِرا صوبہ ٹی گچین کاری تے پد بٹنگ نا کیس ءِ بننگ آن بشخنداری کرے ہرانا سوب آن عدالت نا لارجر بینچ پنا۔ سپریم کورٹ نا 5 باسکی لارجر بینچ ہراتم سماعت کن بس تو چیف جسٹس پاکستان پارے کہ جسٹس امین الدین خان گڑاس پاننگ خواہک۔ داوخت آ جسٹس امین الدین کیس ءِ بننگ نا بشخنداری کرے۔ جسٹس امین تدوک آ دے انا فیصلہ نا رد اٹ بننگ آن بشخنداری کرے۔ جسٹس امین پارے کہ جسٹس قاضی فائز عیسیٰ نا فیصلہ غان پد کیس ءِ بننگ آن بشخنداری کیوہ۔ جسٹس امین الدین نا ہیت کننگ آن پد بینچ کورٹ روم آن ہنا۔ جسٹس امین ناکندآن بشخنداری آن پد عدالت نا لارجر بینچ پنا و داسہ کیس اکن پوسکن ءُ بینچ اس ٹہیفنگک۔ تدوک آ دے سپریم کورٹ رولز جوڑ کننگ اسکان آرٹیکل 184 تھری (ازخود نوٹس) نا کیس تے پد بٹنگ نا پرمان کرے۔ سپریم کورٹ اٹ حافظ قرآن ءِ 20 ودکی نمبر تننگ نا ازخود نوٹس اٹ جسٹس قاضی فائز عیسیٰ ناکماشی ٹی 3 باسکی خصوصی بینچ فیصلہ جاری کرے۔ خصوصی بینچ اٹ جسٹس امین الدین و جسٹس شاہد وحید اوار ءُ و فیصلہ اِرٹ اسٹ نا کچ اٹ جاری کننگا‘ فیصلہ ٹی پاننگاسس کہ رول جوڑ کننگ اسکان آرٹیکل 184 تھری نا کل کیس تے پد بٹنگے۔ فیصلہ نا رد اٹ چیف جسٹس پاکستان تون خصوصی بینچ جوڑ کننگ ناواکداری اف‘ سپریم کورٹ رولز اٹ چیف جسٹس اسپیشل بینچ جوڑ کننگ کپک۔ اسپیشل بینچ اٹ چندی بینچ آتیان اسہ اسہ جج ءِ اوار کننگاسس۔ عدالتی وخت انا چٹنگ نا وخت آ کیس ءِ سماعت کن پن کننگاسس‘فیصلہ ٹی پاننگاسس کہ پاکستان نا الس پارلیمنٹ نا باسک آتا گچین کننگ ناوخت آاوفتا احتساب ءِ کیک‘ پارلیمنٹ نا باسک آتیان گچین کاری تا وخت آ الس حساب ہلیک۔ کانود نا رد اٹ حکومت بیوروکریسی آن حساب ہلیک‘ عدلیہ غان دا وڑ کس اس حساب ہلنگ کپک۔

(مانیٹرنگ ڈیسک)