بلوچستان‘ لوڈشیڈنگ اٹ کمتی کن گام گیج کننگ انگ ءِ، ہاشم نوتیزئی

کوئٹہ : بنجائی وزیرمملکت برائے توانائی میر حاجی محمد ہاشم نوتیزئی پارینے کہ توانائی تنکی نا مون ءِ توننگ کن بدل گیگ نا وڑ اٹ سولر و ونڈ انرجی نا کنڈ آ ہننگ المی ءِ‘ بجلی دزی ءِ توننگ کن ریسہ اٹ ڈیجیٹل میٹر خلنگ انگ ءِ بلوچستان اٹ لوڈشیڈنگ نا کمتی کن گام گیج کننگ انگ ءِ‘ ایران تون معاہدہ نا رد اٹ 100میگا واٹ پین بجلی گوادر پسنی جیوانی و اورماڑہ ءِ فراوان کننگانے‘ حکومت مچ آ ملک آن لوڈشیڈنگ ءِ چٹفنگ کن پرعزم ءِ۔ دا خیال آتا درشانی ءِ او ہیت وگپ کرسا کرے۔ وزیرمملکت برائے توانائی پارے کہ نن مچ آ ملک آن لوڈشیڈنگ ءِ چٹفنگ کن پرعزم ان و دا رد اٹ گام گیج ہم کننگ انگ ءِ چنکو ویل اسے نا سوب آن بند بجلی گھر تے ریسہ اٹ فعال کننگ نا چرجوئی برجاءِ‘ وخت اس کہ بجلی نا دزی ءِ توننگ کن ڈیجیٹل میٹر خلنگ انگ ءِ‘ او پارے کہ ای پورو کوشست کننگ اٹی اٹ کہ بلوچستان اٹ لوڈشیڈنگ نا وخت و پاس ءِ کم کننگے‘ زمیندار تے بے سلنگ آن بجلی نا فراوانی ہم گام گیج کننگ انگ ءِ‘ ہندا رد اٹ ایران تون معاہدہ ہم کننگانے ہرانا رد اٹ گوادر پسنی جیوانی و اورماڑہ ءِ 100 میگا واٹ پین بجلی نا فراوانی بنا کننگانے‘ او پارے کہ پوسکن آ خواست آتے مون آتخسا ننے توانائی نا پیداواری لائخی تے ودفنگ کن سولر و ونڈ انرجی سورس نا کنڈآ ہنوئی مریک انتئے کہ ننا میدانی علاقہ غاک بھاز باسن و مَشی آ علاقہ غاتے ٹی تہو تیز چلینگک ہراڑان نن بجلی دوئی کننگ کینہ۔ اوپارے کہ مچ آ صوبہ ٹی لوڈ مینجمنٹ ناپرمان کننگانے و کمامدار آتے پاننگانے کہ ٹاسفارم تے اوورلوڈ کننگپ انتئے کہ اوورلوڈ ناسوب آن ٹاسفارمک ہشنگرہ وصارف آک خوار مریرہ‘ او پارے کہ صووبہ نا الس نا خذمت کننگ ننا مشن ءِ و ہندا جوزہ اٹ کاریم کننگ اٹی ان‘ الس صارف آک ہر وڑ انا غاو تیکن برائے راست رابطہ کیر تو دمدستی ایسر کننگک۔ او پارے کہ بلوچستان نا زمیندار تے بے سلنگ آن بجلی نافراوانی ءِ اولیت ایتنہ و دا رد اٹ گام گیج ہم کننگ انگ ءِ‘ نن پرعزم ان کہ باسنی نا مُد اٹ الس ءِ زیات آن زیات ریلیف فراوان کننگے۔

(آن لائن)