لسبیلہ، بس شکست، کمپنی نا پرمٹ منسوخ، مالک آتیا مقدمہ درج
ٹریکر سسٹم ءِ فعال کرسا سخت گام گیج آتا کمک اٹ پیٹرولیم مصنوعات نا پبلک ٹرانسپورٹ اٹ سپلائی آ رکھ خلنگک، چیف سیکرٹری بلوچستان
Get real time updates directly on you device, subscribe now.
کوئٹہ: چیف سیکرٹری بلوچستان عبدالعزیز عقیلی پارینے کہ بس شکست نا کمپنی مالک آتا برخلاف مقدمہ درج کرسا بس انا روٹ پرمٹ ءِ منسوخ کننگانے۔ بروک آ وخت اٹی شکست آتا توننگ و انسانی جان تا زیان ءِ توننگ کن گام گیج کرسا ڈرائیونگ لائسنس نا سسٹم ءِ آن لائن و گنڈوک جوڑ کرسا ٹریکر سسٹم ءِ فعال کننگک، و سخت گام گیج آتا کمک اٹ پیٹرولیم مصنوعات نا پبلک ٹرانسپورٹ اٹی سپلائی آ سختی اٹ رکھ خلنگک۔ پی ٹی اے و آر ٹی اے گچین بست و بند کیرہ، سیکرٹری ٹرانسپورٹ نا کماشی ٹی جوڑ کمیٹی آخبت نا بابت لائحہ عمل اسے کن ٹرانسپورٹر آتا اواری اٹ حکمت عملی اس سجفک۔ دا ہیت آتا درشانی ءِ او تینا دفتر اٹی پریس کانفرنس نا وخت آ کرے۔ دا وخت آ سیکرٹری ٹرانسپورٹ عبدالصدیق مندوخیل، حوالکاری و شینکاری سیکرٹری شفقات علی، وزیراعلیٰ نا پریس سیکرٹری کامران اسد تون اوار ایلوفک ہم ساڑی ئسر۔ چیف سیکرٹری بلوچستان نا پاننگ ئس کہ لسبیلہ واقعہ بھاز است ہسونی نا سوب ءِ۔ ہراٹی نہادی جانک زیان مسر۔ بس مالک و ڈیور آک بھاز ڈیوالئی کننگ ءُ۔ ایرانی ڈیزل اسمگل کننگک، پولیس ڈیور و کمپنی مالک آ مقدمہ درج کرینے، ولے داسکان ہچ ءُ دزگیری اس متنے، دا بس انا روٹ پرمٹ ءِ ہم منسوخ کننگانے، اونا پاننگ ئس کہ خضدار آن حب اسکان موٹر وے پولیس مفک، ہرانا سوب آن اوفتا مفننگ نا دُو آن ڈیور آک گاڈی چلیفنگ اٹ ہَز کپسہ۔ اِرا سال مست گاڈی تا اسپیڈ ءِ کنٹرول کننگ کن پبلک ٹرانسپورٹ و کمپنی تا گاڈی تیٹی ٹریکر ہم خلنگاسس، دمدستی وڑاٹ ٹریکر آتے فعال کننگ کن گام گیج کننگانے، تاکہ تیز ہننگ نا مون ءِ توننگ مرے، و دن انگا واقعہ غاتا توننگ ءِ پک کننگ مرے، ڈرائیونگ لائسنس نا عمل ءِ آن لائن کننگ انگ ءِ، و دادے پین سخت کننگ انگ ءِ، تاکہ ڈرائیونگ لائسنس دوئی کروک آک تینا لائخی و بود آ لائسنس ہلنگ کیر۔ آئی جی پولیس بلوچستان آر ٹی اے و پی ٹی اے ءِ ڈرائیونگ لائسنس نا بابت خصوصی پارت کننگانے، و پولیس ءِ ڈرائیونگ لائسنس نا گنڈوک و گچین نظام اسے کن حکومت وسیلہ و آسراتی فراوان کیک۔ پولیس جاست پاست کننگ اٹی ءِ، زموار آتا برخلاف کانود نا رداٹ کارروائی مریک۔ و پبلک ٹرانسپورٹ اٹی پیٹرولیم مصنوعات نا سپلائی آ سختی اٹ رکھ آ عمل کننگک، تاکہ دن انگا شکست آتا توننگ ءِ پک کرسا انسانی جان تا زیان ءِ توننگ مرے، بس شکست اٹی 41 بندغ کزیت کریر، وخت اس کہ مسٹ ءِ زندہ بچفنگا۔ انتظامیہ 40 منٹ اٹی واقعہ نا جاگہ غا سر مس، و حکومت دمدستی واقعہ نا نوٹس ءِ ہلک۔ بنائی جاست پاست آن سما تما کہ بس اٹی ایرانی تیل اَلوکہ، ڈیور نا ڈیوالئی نا دُو آن شکست مسنے، خضدار آن حب اسکان موٹر وے نا تعیناتی ءِ پک کننگک، شکست نا گواچی مروک بس انا ٹریکر فعال اَلوکہ، دانا ہم جاست پاست مننگ اٹی ءِ۔
(آن لائن)