لٹ خانہ                   60

اودے تیٹ کوئٹہ ٹی گیس انا آسراتی الو۔ تو کولا نا اسٹوپ اس کوٹی ٹی لگوک ئس نن کوٹھی ٹی پُترینگان تو ننا بدن باسس۔ او مہمانی ٹی، نن اسُل بھاز کُنگن۔ اوکان پد انار تا کُننگ ہم چس کرے۔ سُہب اتون بے شولان تینے چلتن میڈیکل ہال آ سرکرین۔ دا دکان ءِ ملک صاحب لیز آ ہرفیسس۔ داسہ یات بننگ اف کہ سی ہزار آ یا شست ہزارآ۔ مہالو دا دکان جنرل سٹور اس مسوسس۔ دکان مالک بھاز گچین ءُ بندغ اس ئس، او ملک عثمان صاحب نا اخلاق ءِ خنسا اوڑا پین مہربان مسوسس۔ ملک عثمان نا اصل اُرا تو سمنگلی ٹی ئس۔ سمنگلی نا کاسی تے ملک آتا لقب تون مخلوق چاہک۔ کوئٹہ نا کاسی تے ارباب پارہ۔ سرکی نا کاسی تے ہم ملک پارہ۔ کاسیک کوئٹہ ٹی بھلو جائیداد، باغ وڈغار تا خواجہ ءُ۔

سمن گل، دا مَلک آتا (کاسی تا) بُن پیرہ ءِ۔ اونا نسبت دافتا خلق سمنگلی نا پن اٹ پنی ءِ۔ داسہ کوئٹہ نا ائیرپورٹ و پاکستان ائیرفورس نا بیس ہندا پن اٹی ءُ۔ سرکار دا ڈغار تے کاسی تیان ہلک داڑے ائیرپورٹ وبیس جوڑ کرے۔ بھلو حال حوال اسے آن پد کاسیک فیصلہ کریر کہ دا تینا میراتی آ ڈغار ءِ سرکار آ سودا کننگے۔ ملک صاحب ءِ ہراتم تینا بشخ انا ڈغار نا بہا نا ایوَز پیسہ غاک دو بسر تو او ہموفتیان میڈیکل اسٹور اس مَلا۔ کنے کمکاری کن خواہفے، دُن تو او دکان نا گیشتری کاریم تے مہالو کریسس۔ دُن کہ دکان نا رنگ الماری تا سخت کننگ بورڈ آ لکھنگ درگہ غا کیمسٹ ڈرگ نوشتہ کرفنگ۔ پدا نن لٹ خانہ نا متکن آ سنگت آدم علی حسن ریڈیو والا نا چنکا ایلم سیف الدین بوہرہ، ہرانا سورج گنج بازار اٹی بجلی نا گڑا تا دکان داسکان ارے ءِ ایسن، اودے پاننگا کہ اخس ٹیوب لائٹ نا گرج دکان اٹی ارے خل بوتے۔ تاکہ چلتن میڈیکل اسٹور رُژنا مرے۔ چلتن نا پن ءِ ملک عثمان مہالو سجفیسس۔ اوچلتن ءِ بلوچستان نا اہم انگا مَش سرپند مسکہ ہرا بلوچ و اوغان تا اسٹی نا چیدہ ئس۔ و چلتن نا مَش انا اسہ ہندن ءُ فوٹو اس ہراٹی چلتن نا کہان آ برف تموک ئس ہمودے دکان اٹی خلکوسس۔

ملک عثمان دا کاروبار ءِ بنا کننگ آن مست کنا سلاہ ءِ ہلسا پارے کہ دا ننا شریداری آ کاروبار مرو (او پین ہیت اسے کہ نن ہڑتوم آک ملکیت نارداٹ پاش ءُ سوچ اس تختونہ) گڑا ملک عثمان پدا کن کن اُرا اس ہم پٹّنگ ءِ بنا کرے، ہراٹی ای تینا خاہوت تون اوار رہینگوسٹ۔

منہ تُو آن پد او تینا سیال اس، ارباب تاج محمد نا خالی ءُ اُرا اس خنا، ہراکہ ہُدہ منوجان روڈ آ ئس۔ تاج محمد نا اُرا ہندا خالی آ اُراتون اسیجا ئس دا جاگہ ءِ او تینا سوف تا گودام کن کاریم اٹی ایسوسس۔ دا فیصلہ مس کہ تانکہ داٹی تخوک آ سوفک بہا متنو نی انتظار کر۔ مکان نا فارغ مننگ اسکان ملک صاحب کنے تینا اُراٹی مہمان کرے۔ ملک صاحب ءِ جوان ءُ پُچ بیننگ نا بھاز شوق ئس۔ او کنے تین تون اوار برٹش ویئرہاﺅس آ درے، ہراکہ کوئٹہ کلاتھ مارکیٹ اٹی ئس۔ اوٹی بھاز فیشنی و باسن ءُ کوٹ و پُچ رسینگاکہ، ہرافتے خاص کر سرکاری ملازم آک بینارہ۔ کن کن کوٹ اس جوڑ کننگ کن او بھاز زیبا و انگریز تا وڑ انا پُچ اس ہلک و پتلون کن تے سلیٹی رنگ انا پُچ اس گچین کرسا ’نقشبند‘ درزی نا رہی آ درے۔ ہراکہ بلوچی اسٹریٹ اٹی رہینگاکہ۔ کوٹ ءِ اودے مُوغنگ کن تس۔ پدا ہنداگلی ٹی اسہ پین درزی اسے نا رہی آ ہنان اودے پتلون ءِ مُوغنگ کن تس او زمانہ ٹی ولی محمد (سریاب نا شاہوانی اس ئس) جوان ءُ پتلون موغاکہ۔ ملک صاحب اسک ہندا اِرا درزی تیان تین کن یخ انا پُچ و کوٹ موغفیرہ۔ دافتیان بیدس کن کن بوٹ و زیبا ءُ ٹائی اس ہم ہلک۔ ولدا ای میڈیکل نا کاریم کروک آتیان پنی آ دوائی تا کمپنی تا ڈس وپت ءِ دوئی کریٹ۔ ہندن ملک صاحب نا مہروان آ خڑک انا سیال اکبرجان ہم سلاہ تس کہ اونا ایلم اسلم جان ہراکہ بندروڈ آن خڑک رہینگک اوڑان Cooper تون ملف ہراکہ غٹ کمپنی تتون واخب ءِ۔ گڑا ای ہم ملک صاحب نا اخلاق و خلوص آن Inspire مرسا سد شوق اٹ کراچی کن سرہلکُٹ۔ اوڑے بندروڈ آ جاگیردارہوٹل اٹی اڈکریٹ۔ ہفتہ سے ٹی سرجمی ٹی غٹ کمپنی تے پٹاٹ۔ اوفتے چلینگوک آ، واو وخت اہم انگا دارو تا آرڈر تسٹ۔ کوئٹہ نا ایلو پنی آ میڈیکل اسٹور ’سلیم میڈیکل، بابر میڈیکل، کوئٹہ میڈیکل و رازی فارمیسی نا خواجہ غاک تینٹ بسرہ، ملک صاحب ءِ سلاہ تسرہ۔ دا ملک صاحب نا انسان دوستی و مہر آتا شرفمندی ئس۔

اسلم جان کنے کوپر تون ملفے او تینا اُرا غا درے ہراکہ پارسی کالونی ٹی ئس۔ ماما پارسی اسکول نا سروگا ہوشنگ کوپر Cooper ئس۔ عمرتے گدرینگاسس داسہ ضعیف ئس، او بھاز تجربہ کار و انسان دوست ءُ بندغ اس ئس۔ او کنے تینا اُراٹی ساڑی خاہوت و چنا تتون ملفے و پارے کہ دا اسلم جان نا سیال اسے۔ مطلب داکہ پیر انگا ’کوپرCooper کنے بھاز گچین ءُ سلاہ تس وکن تون بھاز کمک کرے۔ زندگی ٹی اسہ پارسی زرتشی اُرا سے ٹی ہننگ نا دا اولی و آخری واقعہ ئس۔ پارسیک بھاز مہروان مہذب و انسان دوست ءُ بندغ ءُ۔

ای تینا کاریم ءِ سرجم کرسا اُست جمی اٹ کوئٹہ غا رسینگاٹ۔ ملک عثمان داڑے کنا کسر آ چاری ئس۔ او تینٹ کنے ٹیسن آن گاڈی ٹی ہرفے۔ اونا پُژہ غاک کنے بھاز دوست ئسُر۔ ہرافک کرل Crule و مَون ئسُر۔ او تینا پُژہ غاتے کوئٹہ نا پنی آ نائی، نواب آن جوڑ کرفیکہ۔ ملک صاحب نا عجیب ءُ عادت اس ئس ہڑدے کاٹم مشاکہ، اخس یخ مروسس او پژہ غاتے ضرور سلاکہ۔ تینا پژہ غاتا بھاز خیال ءِ کریکہ۔

داسہ دوائی تا پارسل آک بَننگ ءِ بنا کریر۔ دا وخت اسکان ملک صاحب بھاز لائخ و شائستہ ءُ سیلز مین اس تخاسس۔ ظہیرصاحب ہراکہ ہندوستائی اس ئس۔ ہنداوڑ او ’امین الدین پیرامیڈیکل کالج آن سند ہلوک ڈاکٹریوسف صاحب‘ ءِ داڑے دکان اٹی ایس تاکہ او ناجوڑ تے ہُرے و دارو درمان ایتے۔ نن دے درست آ دے بروک آ دوائی تا پارسل آتے ملسا دکان نا الماری تے ٹی سوارانہ۔ ہندادے تیٹ کنا مار ادریس نا کزیت آن پد ارٹمی مار ’جیئندخان‘ ودی مس۔ ہندا وخت آ تاج محمد بس کنے پارے کہ مکان خالی مسنے اودے چون و رنگ کننگ اُن۔ نی تینا چناتے داسہ دا مکان اٹی اتنگ کیسہ۔ گڑا ای ملک صاحب نا موکل اٹ نوشکے آ ہناٹ تینا خاہوت تون اوار جیئندخان، لمہ و بھلا ایڑھ ءِ ایسٹ۔ منہ دے ملک صاحب نا اُراٹی مننگ آن پد او ننے ہدہ منوجان روڈ آ درے ایڑے تاج محمد نن کن اِرغ کریسس۔ ہمو اُراٹی کوئٹہ نا سوف تا زباد داسکان تالان ئس۔ پدا ملک عثمان کنا بھلا مسڑ ہراکہ شش سال انا وئی ٹی ئس، اودے سینٹ جوزف گرلز کالج اٹی داخل کرے۔ ای بھاز منع کریٹ تے کہ داخس خڑچ کننگ نا انت ضرورت۔ اودے گرلز کالج ہدہ ٹی داخل کر۔ ولے او منتو پارے کہ کنا و عبداللہ جان کاسی نا مسنک ہندا ادارہ ٹی خوانرہ۔ نا چناءِ ہم ہنداڑے اوفتتون اوار خوانوئی ءِ۔ تعلیم و اعلیٰ تعلیم المی ءِ۔ اسُل کہ نن اخہ در خوار مرین، چناتے خوانفوئی ءِ و خاص کر مسن تے خوانفوئی ءِ۔

دکان ہم بھاز جوان بیرفنگا ۔ درستی آ ڈاکٹر آک ننے آ جوان مون کریر۔ اوفک دوائی کن ننے آ مخلوق ءِ راہی کریرہ۔ نن ہم بھاز شوق و خواری اٹ کاروبار تون اختہ مسن۔

هفتئی تلار

25 April-01 May 2020