نقل حرفی……………….اصطلاحات نثر

نقل حرفی:۔ (Copyright)

نقل حرفی، تحقیق نا اصطلاح اسے، ہرانا لغوی معنہ اسہ عبارت اسے ہندن نوشتہ کننگے، ہرا وڑ کہ او ارے:

”تحقیق نا اصطلاح ٹی ہمو متن کہ ہرا نوشت اسے نا عبارت اٹی ساڑی ارے، اودے ہندن لکھنگے، دن کہ او تینا اصل دروشم اٹی ئسکہ۔“ (اشرف، 347، 2017ء)

وخت اس کہ تحقیق اٹی ہندن ہم مریک کہ کس اس خاص وڑ اٹ خوشنویس و کاتب اس متن اسے تو سہی وڑ خوانک، ولے ہراتم و ہندا متن نا نقل ءِ کیک، یعنی نوشت اٹی اتیک تے، تو اوڑان املا نا رد اٹ چندی ردیک مریرہ، وہندا ردیک پد آن متن نا اصل عبارت اسے نا مطلب ءِ بدل کیرہ، ہراڑان ہمے اصل عبارت نا متن نا درک لگپک۔

نقل حرفی نا رد اٹ کاتب ءِ بھاز خوڑتی اٹ اصل عبارت ءِ خوانوئی تمک، تاکہ املا نا ردیک مون آ بفس۔ انتئے کہ مقالہ نوشتہ کننگ نازرک ءُ کاریم اسے، ہراڑکن بھاز چاہنداری و دماغی متا ماری نا گرج مریک۔

اثر ہلوک یاتگیری:۔ (Affective Memory)

اثر ہلوک یاتگیری ڈرامہ نا اصطلاح اسے۔ ڈرامہ ٹی دا تکنیکی اصطلاح ءِ کاریم اٹ اتوک روس انا پنی آ ہدایت کار و نوشتوک کونسٹین لن سرگیوچ (1863-1938) ئسکہ۔

ڈرامہ، فلم و تھیٹر اٹی دا تکنیک اٹی اسہ کڑدار اس کہ او تینا جوزہ غاتے درشان کننگ کن تینا زند انا آزموندہ غاتے بنداو جوڑ کیک، و ہراڑان اونا تدینگوک آ زند انا اثر ہلوک یادداشت ءِ کڑداری دروشم اٹی پاش کیک۔ اثر ہلوک یادداشت آک امر ءُ بندغ اس مرے، اوڑتون دا مچ آ زند گون مریرہ، ہراڑان کس اس جوان ءُ اثر اس ہلیک، تو کس خراب۔

دا ہمو احساس و جوزہ غاک مریرہ، ہراٹی زند انا ہر اسہ تدینگوک آ ساہت اسہ پوسکن ءُ کلہو اس ایتک۔ ہندن دا کلہو وخت اس گچین ءُ اثر اس تالان کننگ نا سوب مریک، تو وخت اس دا مغز ءِ چکر تروک ءُ ڈکھیا کروک مریک۔ ہرانا اثر تیویٰ زند آ تمک۔

کانڈا انگا متن:۔ (prominent compactuase text)

تحقیق نا اصطلاح ٹی دا ہمو متن ءِ ہرا تینا دروشم اٹ ایلو متن تیان جتا و کانڈا مریک۔ یعنی ہمو متن ہرا تیان دروشم اٹی چٹ جتا، کانڈٓ، پورو وڑ اٹ نوشت اٹی خواننگ مرے۔

دن کہ دستاویز آک، نوشتئی آ تختیک، سکہ غاک، کتبہ غاک، ماڑی و دمب آک، ٹکریک، مصوری، زرتول آ ہیت آک، نوشتئی آ نشخ آک، کہ ہرافک لازوال ءُ۔

دا وڑ انا متن آک اسہ خاص ءُ اہمیت اس تخرہ، انتئے کہ دا تینا زمانہ نا ڈیک مریرہ۔

ہفتئی تلار

تاک:04

28-22 جنوری 2022ء

پنہ: 04