بلوچستان اٹ اولیکو پبلک پرائیویکٹ پارٹنر شپ نا معاہدہ غا دستخط

اسلام آباد: حکومت بلوچستان بلوچستان پبلک پرائیویٹ پارٹنرشپ اتھارٹی (BPPPA) و بلوچستان ٹیکنیکل ایجوکیشن اینڈ ووکیشنل ٹریننگ اتھارٹی (BTEVTA) نا نیام اٹ تینا اولیکو پبلک پرائیویٹ پارٹنرشپ (PPP) معاہدہ غا دستخط کرے۔ دا معاہدہ غا تعلیم فاؤنڈیشن تون اوار ہنر فاؤنڈیشن و مینجمنٹ اینڈ ڈویلپمنٹ سینٹر نا شریکی ٹی بلوچستان ہاؤس اسلام آباد اٹ دستخط کننگا۔ اسہ سادہ ولے جوان ءُ دود اسے ٹی چیف سیکرٹری بلوچستان عبدالعزیز عقیلی خاص انگا مہمان نا وڑاٹ بشخ ہلک۔ دستخط نا دود اٹ BPPPA، BTEVTA، تعلیم فاؤنڈیشن، ہنر فاؤنڈیشن، و مینجمنٹ اینڈ ڈویلپمنٹ سینٹر نا نمائندہ غاتون اوار اہم اہم اسٹیک ہولڈر آک بشخ ہلکر۔ تینا تران اٹی چیف سیکرٹری بلوچستان عبدالعزیز عقیلی شراکت داری ءِ بلوچستان اٹ ورنا تا لائخی و روزگار نا وارخواہی ءِ جوان کننگ نا کنڈآ اسہ اہم ءُ گام اس پن کرے۔ او صوبہ ٹی معاشی شونداری و اُلس نا زند آتے جوان کننگ کن پبلک پرائیویٹ پارٹنرشپ نا اہمیت آ زور شاغا۔ رعایتی معاہدہ نا مسخت بلوچستان اٹ تکنیکی تعلیم و پیشہ ورانہ ٹریننگ نا جوانی ءِ۔ ہراٹی 22 واپاری تیا سجفنگانے۔ ہراٹی 5 نیاڑی ٹرینیز اوار ءُ۔ و بھلو واپاری خاص کر تعمیرات، کان کنی، ڈیجیٹل خواندگی، انٹرپرینیورشپ، زراعت/لائیوسٹاک، و متبادل توانائی (شمسی و الیکٹرک گاڑیک)۔ دا معاہدہ 4000 آن زیات طالبعلم آتے تانگ پاکستان نا کمک اٹ صنعتی روابط، قومی و جہانی سرٹیفیکیشن و چینی ادارہ غاتون ڈوئل ڈپلومہ پروگرام دوئی کننگ نا قابل جوڑ کیک۔ طالبعلم آک آن جاب ٹریننگ و سرٹیفیکیشن، کارکڑد تون گنڈوک وظیفہ، و قابلیت تون گنڈوک ٹریننگ آن فائدہ مریک۔ ہراڑان جوان روزگار و تینٹ روزگار نا وارخواہی ودی مریک۔ طارق قمر، سیکرٹری محنت و افرادی قوت حکومت بلوچستان پارینے کہ معاہدہ غا دستخط نا دود بلوچستان نا پبلک پرائیویٹ پارٹنرشپ نا گام گیج آتیکن اسہ اہم ءُ سنگ میل اس ئس و او صوبہ ٹی زرگزرانی شونداری و اُلس نا زند ءِ جوان کننگ اٹ کمک ءِ اہمیت ءِ پاش کرے۔ نن تعلیم فاؤنڈیشن، ہنر فاؤنڈیشن، و مینجمنٹ اینڈ ڈویلپمنٹ سینٹر تون اوار پی پی پی نا دا معاہدہ غا دستخط کننگ آ بھاز خوش ءِ۔

(خ ن)