لورالائی میڈیکل کالج و ٹیچنگ ہسپتال نا آسراتی تے پک کننگک، کمشنر

لورالائی: کمشنر لورالائی ڈویژن محمد گل خلجی تون میڈیکل کالج لورالائی نا پروفیسر، اسسٹنٹ پروفیسر و ایسوسی ایٹ پروفیسر آتا ڈل اس اوڑدہی کرے۔ و تینا کنٹریکٹ نا وخت ایسر مننگ، تنخواہ تا بقایاجات آتا پوروی و وخت آ کنٹریکٹ نا ایکسٹنشن نا بابت اٹ ہیت وگپ کرے۔ اوفتیٹی ڈاکٹر الطاف حسین،ڈاکٹر محمد زبیر،ڈاکٹرمحمد وسیم،ڈاکٹر عبداللہ جان،ڈاکٹر شوکت علی، ڈاکٹر اظہر اعجاز، ڈاکٹر آ فتاب،ڈاکٹر نجم و ڈاکٹر اشتیاق آن بیدس سینئر خزانہ آ فیسر فیصل عمران ہم ساڑی ئس۔ میڈیکل کالج نا ڈاکٹر آک کمشنر ءِ پارے کہ او داڑے کنٹریکٹ آ تعینات مسنو و ہر ارا تو آن پد تنخواہ تا پوروی نا ویل جوڑ مریک ولدا دانا وصولی ٹی دانگ اینگ کروئی تمک۔ و کنٹریکٹ نا وخت ایسر مننگ آ ولدا تعیناتی اٹ ٹائم ہم لگک۔ ہراڑان طالبعلم آتا خواننگ ہم زہمی مریک۔ داڑان بیدس ہسپتال اٹ ہم اوڑکن رہنگوک و ایلو آسراتیک افس۔ کمشنر لورالائی ڈویژن محمد گل خلجی او وخت آ پارینے کہ اُلس ءِ درمان نا آسراتی فراوان کننگ صوبائی حکومت نا اولیکو کاریم ءِ۔ لورالائی میڈیکل کالج و ٹیچنگ ہسپتال علاقہ نا ارا جوان ءُ ادارہ ءُ۔ اوفتیکن آسراتی تا فراوانی ءِ پک کننگک۔ او محکمہ زرگزران ءِ اونا تنخواہ و بقایاجات آتے جاری کننگ نا پارت کرے۔ کمشنر پارینے کہ ڈاکٹر آتا ویل آتا ایسری کن بڑزکو کمامدار آتون حال احوال کننگک۔

(خ ن)