کتاب و اونا خواننگ زندہ ءِ

چیئرمین بلوچی پٹ و پولی لبزانکی گل نوشکے بلوچستان

حمل اسہ ہندن ءُ بندغ اس ئس کہ او ہر گڑا نا بابت معلومداری و چاہنداری تخاکہ، اودے استار، مد و موسم، کشت و کشار، ساہدار تا زانت و علم اتون اوار کتاب آتا رد اٹ اسہ بھلو چاہنداری اس ئسکہ۔ او زند انا کیہی ہتم و شیفی بڑزی تے خناسس۔ ہندا سوب آن اونا دیوان اٹ ہر پارہ غان بندغ آک بسرہ، و اوڑان فائدہ ہلکرہ۔ اسہ وخت اس اونا ماس آ شبر و حمند بسر، اودے پاریر کہ خواجہ حمل! نما وخت اٹ بندغ آک خوانارہ، و ہر گڑا ءِ خوڑتی اٹ ہرارہ، و تینا کروک آ کاریم و ہیت آتا زی آ عمل کریرہ، نی ننے دا پا کہ نمے ٹی دا شوق امر ودی مس؟ حالانکہ راستی اٹ اگہ ہُننگے تو کتاب تون انسان نا سیالی و سنگتی بھاز متکن ءِ، ولے کتاب آتا شینکاری آن مست نم امر خوانارے؟ و امر تینا زانت ءِ ودفیرے؟ حمل ورندی ترسا پارے کہ ننا وخت آ ننا پیرہ غاک، ننا بلہ و راج انا پیہن ریشیک تینٹ کتاب ئسرہ۔ نن اوفتیان بھاز گڑا تے ہیل کرین۔ کتاب آک راستی اٹ اوفتا خیال آتیان رواج ہلکر، ننا وخت آ ننا زبان و دود ربیدہ زندہ و سلامت ئسرہ۔ ننا خلق و پاوال اٹ ہر جاگہ ننا زبان و دود ربیدہ نا زباد آک ننا استخواہی تون اوار ننے بخیر کریرہ۔ وخت اس کہ کتاب آک رواج ہلکر، گڑا نن کتاب خواننگ ءِ بنا کرین۔ نن ہرا گڑا ءِ کہ خوانانہ گڑا ہمو گڑا ءِ پہہ مننگ نا جہد و کوشست ءِ کرینہ۔ ہمو وخت اسکان تاکہ او ننے یات مفروسس، وخت اس ہمو نوشتانک و سوچ ءِ کہ پہہ مسنہ، گڑا اودے نن تینا پوسکن انگا چین ءِ بنفینہ، و اوفتا زی آ تینٹ عمل کرینہ۔ ہندا سوب آن ننا ہیت و گپ مہر و مریبت، نا ہتم ہتم ئسکہ۔ کس اس اگہ خننگپروسس نن اونا بارو اٹ سوج کرینہ، کس اس اگہ ناجوڑ مروسس، نن اونا جان پڑسی کن ہنانہ، ننا مرک و زند اسٹ ئسکہ۔ ننا ہر بندغ غیرت نا چراغ پاننگاکہ۔ نن تینا لوز آتے زندہ تخاسن، انتئے کہ ہر راج انا پجار و پہچان اونا نہادی آ بولی ءِ۔ ہندا سوب آن ننے دا رد اٹ کڑد ادا کروئی ءِ۔ و ننا زانت اٹ دا سوب آن گچینی ئس کہ نن تینا ہر کاریم ءِ وخت انا زی آ کرینہ، وخت انا زی آ خاچانہ، وخت انا زی آ بش مسنہ۔ تینا کاریم تے ایمانداری اٹ کرینہ، و ہر اسٹ نا خیالداری ننا است اٹی ئس، ہندا وخت آ خواجہ حمل آن حمند ارفے کہ خواجہ! ننا وخت آ کتاب خواننگ کم مسنے، دانا سوب انت ءِ؟

خواجہ حمل ورندی ترسا پارے کہ کتاب خواننگ اسُل ہچ کم متنے، ہمو بندغ دا ہیت ءِ کیک، ہرا ہچ کتاب خوانتنے۔ نن تینا ایب کیب انا ملک آتے ہُرن، کہ خواننگ نا رد اٹ اوفتا گمان و رجحان امر ءِ، او کتاب خوانرہ، یا آخا؟ گڑا دا ہیت انا ورندی داڑے دا ودی مریک کہ پیشن نا ملک انا بندغ آک کتاب آتے تینا است آ تخانو، ہر جاگہ او کارہ کتاب آک اوفتتون تد ءُ، اوفتے ہراتم وخت ملا اوفک خواننگ ءِ بنا کیرہ۔ نن داسکان کیہی سال گدرینگانے، واہم خواننگ اٹی اُن، ننا خواننگ اٹ ہچ کمتی بتنے۔ بلکن دے پہ دے داٹی گیشتری برسا ءِ، اوچس و مزہ کتاب نا خواننگ اٹی ءِ کہ اسہ پین گڑا سے ٹی اف۔ ہراڑسکان کہ موبائل نا ہیت ءِ تو اصل اٹ ننا بندغ آک داسکان موبائل نا کاریم اٹ اتنگ ءِ تپسہ، پیشن نا ملک انا بندغ آک اوڑان فائدہ ہرفسا اونا رد اٹ تینا فکر و کتاب آتے مون آ اتیرہ۔ و تینا فکر ءِ جہان نا کنڈ آ تالان کرسا ءُ۔ ہندا سوب آن اوفک ہر دیوان اٹ یات مریرہ۔ کنا فلسفہ اٹ کتاب و اونا خواننگ زندہ ءِ۔ دا فلسفہ ہمودے سما ءِ کہ او کتاب خواننگ اٹی ءِ، دا شبر و حمند جان نما زمواری تیٹ اوار ءِ کہ نم تینٹ کتاب خوانبو و پہہ مبو۔ ایلوفتے ہم دا پڑ آ اتبو گڑا ہر پارہ غا کتاب نا مینار تینٹ جک مریک۔

ہفتئی تلار

تاک:04

28-22 جنوری 2022ء

پنہ: 02