القہار جل جلالہٗ

اللہ نا پن تیان اسہ پن اس ”القہار جل جلالہٗ“ ارے۔ دا غیر عربی ءُ لوز اس اف، کہ دانا معنہ قہر، ظلم مرے، بلکن دا عربی ءُ لوز اسے، دانا معنہ ءِ غلبہ والا ذات کہ کل آ غالب مرے۔ و ایلوفک اونا مون اٹ مغلوب مریر۔

حضرت مولانا مفتی محمد تقیؒ فرمائفک کہ اللہ پاک نا پن تیٹ ہچ ءُ دن ءُ پن اس اف کہ او عذاب نا معنہ ایتے۔ بلکن ”القہار جل جلالہٗ“ہمو ذات ءِ کہ مخلوق اونا موکل آن بیدس ہچ کننگ کپ، و او امر خواہے ہندن کے، اللہ تعالیٰ نا پنک اونا رحمت نا معنہ ءِ ایترہ، یا ربوبیت و قدرت نا یا خالقیت و مالکیت و رازقیت نا معنہ ءِ ایترہ۔ تو معلوم مس کہ اونا اصل سِفت رحم انا ءِ، کہ تینا مخلوق آ رحیم و کریم ءِ۔ البتہ ہرا وخت کہ بندغ گناہ کرسا ہَد آن گدرینگک، گڑا اونا پارہ غان دا بندغ آ غضب شیف مریک، و اونا غضب ہم برحق ءِ۔ 

دا اسم مبارک نا بارواٹ علماءِ کرام آک منہ سِفت بیان کرینو:

-1 القہار جل جلالہٗ ہمو ذات ءِ کہ دنیا نا ہر ہر گڑا اونا غلبہ و قدرت نا ماتحت مرے۔

-2 القہار جل جلالہٗ ہمو عظمت، جلال والا ہستی ءِ کہ اونا مون آ مچ آ مخلوق بے طاقت و عاجز مرے۔

-3 امام ابن کثیرؒ ”وھوالقاہرفوق عبادۃ“سورۃ انعام نا آیت نا تفسیر اٹ نوشتہ کیک کہ ”اللہ پاک ہمودے کہ تینا مخلوق آ غالب ءِ، کل انا کاٹمک اونا مون آ شیف مریرہ، بھلا بھلا ظالم، جابر آک ہم اونا تابعدار ءُ۔

از ابن الحسن ابابکی

ہفتئی تلار

تاک: 36

19-25 September 2020

پنہ، 1