براہوئی ادبی حوال 5

عبدالقیوم بیدارؔ

0

Get real time updates directly on you device, subscribe now.

مون نا اسہ کالم اسیٹی اکادمی ادبیات نا پارہ غان زُوم کانفرنس نا حوال مون آ اتنگاسس، ہراٹی براہوئی ادب اٹ وطن دوستی نا حوالہ اٹ شاعری کروک شاعر آتا پِن تے نوشتہ کریسُٹ۔ دا کالم اٹ مُچ آ براہوئی شاعر آتا پِنک بننگ کتوسہ، ہندا خاطرآن دا کالم اٹ گڑاس شاعر آتا پِن تے نوشتہ کریسُٹ، ہراڑان پد گڑاس سنگت کنے آن گِلہ کریر کہ فلانی نا پِن اف، و بھاز انگا شاعر آتا پِن تے نی گیرام کریسُس۔ ای پاریٹ کہ دا اسہ ادبی ءُ کالم اسے، ہراٹی ہر گڑا گونڈ نوشتہ مریک۔ داٹی مچ آ براہوئی ادب نا احاطہ مننگ کپک، ہندا خاطر آن بیرہ مثال کن ای گڑاس شاعر نا پِن تے تسٹ۔ اسہ سنگت اس سوشل میڈیا غا نوشتہ کرے کہ وطن دوستی نا حوالہ ٹی حمید عزیز آبادی نا بھلو خذمت اریر۔ ای نمے دا پاو کہ ہرا کالم ءِ ای نوشتہ کریسُٹ اوٹی انگریز آتا خلاف آزادی نا جہد و براہوئی ادب اٹ وطن دوستی نا شاعر آتا تذکرہ ئسکہ۔ ہراٹی گیشتری انگریز آتا برخلاف آزادی نا جہد انا بارو اٹ نوشتہ کرسا براہوئی نا کلاسیکل شاعر و انگریز آتا برخلاف جنگ کروک آ وطن نا مجاہد آتا ذکر ئسکہ۔ ہندن براہوہوئی شاعری ٹی مزاحمت نا بابت گڑاس جدید دور انا شاعر آتا ذکر ءِ کریسُٹ۔ اگہ کُل انا پِن تے نوشتہ کیو تو اسہ کتاب اس مننگ کیرہ۔ ولدا ہم ہرا پِنک سلیسُر او ہم ناپورو مرور۔ گڑاس پن نوشتہ کننگے تو واحد بخش جمال، خدارحیم بیتاب، حمید عزیز آبادی، غمخوار حیات، اسحاق سوز، عبدالجبار یار، پروفیسر طاہرہ احساس جتک، ڈاکٹر اعظم بنگلزئی، عبدالصمد شاہین، محمد موسٰی طُور، عبدالباقی دُرخانی، گُل بنگُلزئی، غلام حیدر حسرت، خلیفہ گل محمد نوشکوی، عزیز راہی، سلام صابر، حسین بخش ساجد، اقبال ناظر، منیر رئیسانی، نور خان محمد حسنی، پروفیسر غلام دستگیر صابر، شیخ عتیق حسرت مینگل، شہزاد نذیر، اقبال زاہد، کفایت کرار، عبدالرشید ہمدم، علی ثاقی، ابرار برکت، عبید ابدال، عزیز راسکوئی، ڈاکٹر لیاقت سنی، غریب شاہ انجم، عطاء انجم، فیض بولانی، محسن فگار، یونس کُرد، یوسف عجب، حسن ناصر، سائر عزیز، راشد جانان، عبدالنبی انجم، زاہد نسیم جلال آبادی، محمد صالح شاد، حمیرا صدف حسنی، محمد اسلم شاکر، ملک ظاہر شمیم اسک دا لڑ اٹ بریرہ۔

ہرا وخت آ نن براہوئی ادب نا جاچ ءِ ہلینہ تو اولیکو وار وطن دوستی نا حوالہ ٹی رئیس نبی داد لانگو نا کتاب ئس، ہرا1981 اٹی شینک مس، دا کتاب ءِ براہوئی اکیڈمی شینک کرے۔ و ارٹمیکو وار دا کتاب 2015ء ٹی شینک مسنے۔ داڑان بیدس وطن دوستی نا بابت گیشتری شاعر آک تینا مجموعہ غاتے ٹی وطن دوستی نا بابت نظم و غزل نوشتہ کرینو۔ وطن دوستی نا بابت ہر دور اٹی شاعر آک تینا ڈیہہ ءِ نازیفسا گچین ءُ شاعری کرینو۔ و ظلم و زوراکی نا برخلاف تینا توار ءِ بُڑز کرینو۔ انتئے کہ شاعر و ادیب ہم تینا ڈیہہ، ڈغار و مُچ آ جہان اٹی امن نا خواست گار مریک۔ ہندا خاطر آن اوفک انسان نا زند اٹی مروک آ ویل و ڈُکھ، ظلم و زوراکی، لُٹ و پُل، ناحق ہلنگ خلنگ و بے انصافی تا برخلاف تینا توار ءِ بُڑز کرسا بسنو و تینا قلم اٹ راج ءِ شون و شرحالی نا کُنڈ آ ہِننگ نا سبخ ءِ تسنو۔ دا ظلم و زوراکی سردار یا نواب اسے آن مرے، ریاست نا مرے یا جہان نا زواک آ آمر آتا نیمہ غان، دا کُل انا برخلاف شاعر آک تینا حق ءِ ادا کننگ نا کوشست ءِ کرینو۔ 

انتئے اینو بے غم اریس

تُوسُس اینو دُوتے تفیس

تُغ اٹ تینے انتئے دریس

ٹُوہہ دا قوم ءِ بش کرک

بیداری ٹی مون آ ہِنک

تالان پِت آک داڑے اریر

مظلوم آتے دا شل کریر

لمبہ کرک، نابُود مریر

خوشی تے داڑے نی اتک

بیداری ٹی مون آ ہِنک

٭٭٭٭٭

دا دھرتی نا نن باتیک اُن

پوریا گِر تا نن ساتھیک اُن

نن حق ءِ ہلون یا اودے پُلون

نُم چارے ننے یا تِپّیرے

نن قوم اس ارین قوم آ تیٹی

سیالی کینہ سیال آ تیٹی

بولی ءِ ننا بِن زیبا غا

نُم چارے ننے یا تِپّیرے

ہفتئی تلار

تاک: 35

12-18 September 2020

پنہ، 4

Get real time updates directly on you device, subscribe now.

Leave A Reply

Your email address will not be published.