بنجائی حکومت نا اعتراض‘ اسہ پین جج اس پیش تما‘7باسکی بینچ پنا

اسلام آباد: سپریم کورٹ اٹ فوجی عدالت آتے ٹی سویلین تا ٹرائل نابرخلاف درخواست آتا سماعت ناوخت آ بنجائی حکومت جسٹس منصور علی شاہ غا اعتراض کرے‘ بینچ اسہ ولدا پنا۔ دوشنبے نا دے فوجی عدالت آتے ٹی سویلین تا ٹرائل نا برخلاف درخواست آتا سماعت ءِ چیف جسٹس ناکماشی ٹی 7 باسکی بنچ ننا کرے‘ سماعت نا بناٹی اٹارنی جنرل آف پاکستان بنجائی حکومت نا پرمان آ جسٹس منصور علی شاہ غان بینچ آن جتا مننگ نا خواست کرے‘ اٹارنی جنرل روسٹرم آ بس و بینچ انا بابت بنجائی حکومت نا پرمان آن معلومدار کرے‘ اٹارنی جنرل پارے کہ اسہ درخواست تروک اس جسٹس منصور علی شاہ نا تینائی سے‘ ہندا سوب آن اونا کنڈکٹ زہمی مننگ کیک‘ چیف جسٹس ریمارکس تس کہ نما استخواہی آ بینچ جوڑ مننگ کپک نی ہرا ہیت آ عدالت نا شرفمند جج آ اعتراض کننگ اٹی اُس۔ جسٹس منصور علی شاہ پارے کہ ای تو اولیکو دے آ پاریٹ کہ کس ءِ اعتراض ارے تو پاہے‘ اٹارنی جنرل پارے کہ کنا ذاتی وڑ اٹ ہچ ءُ اعتراض اس اف‘ ہراکان گڈ جسٹس منصور علی شاہ تینٹ بینچ آن جتا مس‘ جسٹس منصور علی شاہ پارے کہ ای وخت اس ہم ہمو بینچ اٹ تولتنٹ ہراٹی کنے آ کنڈ ہلنگ نا گمان مرے۔ چیف جسٹس اٹارنی جنرل ءِ پارے کہ نی ہرا بنداو آ اعتراض کننگ اٹی اُس‘ فائدہ غان چَپ یا کنڈہلنگ نا بنداو آاعتراض کننگ اُس‘ نی ننے ہم خیال جج انا شغان خلیسہ‘ نن مدام تحمل آن کاریم ہلکونن‘ نن عدالتی فیصلہ غاتیا عملدرآمد کپروک آتے سزا تتنن‘ نن سرپند مرینہ کہ داوخت اسہ گام اس پدی مننگ ناءِ‘ حکومت عدلیہ ءِ بے شرف کپ‘ عدالت نا فیصلہ غاتیا عملدرآمد اخلاقی زمواری ءِ‘ نن تون فیصلہ غاتیا عمل کفنگ کن ہچ ءُ چھڑی اس اف‘ بھاز آبندغ آتتون چھڑی ارے ولے اوفتتون اخلافی تک اف‘ جسٹس جواد ایس خواجہ درویش صفت ءُ انسان اسے اونا سیاست تون ہچ تعلقداری اف۔ اٹارنی جنرل پارے کہ کنا ذاتی وڑ اٹ ہچ ءُ اعتراض اس اف‘ چیف جسٹس دا وخت آ اٹارنی جنرل آ مون ءِ ہڑسا پارے نی بھاز جوان ءُ کڑدار و جوان ءُ وکیل اسے اُس‘ اسہ پورو ءُ سیریز اسے ہراٹی بینچ آوار وار آ اعتراض کننگ انگ ءِ‘ مہالو شرہ مس کہ پنجاب گچین کاری نا فیصلہ 3 جج انا ئس یا چار انا‘ نی اسہ وار ولدا بینچ ءِ جھیڑہ ئی کننگ اُس۔ داوخت آ حامد خان جج آتیان کیس ءِ بننگ نا خواست کرے‘ جسٹس منصور علی شاہ پارے کہ نی پُہہ مننگ نا کوشست کر‘ دا جج آتا تینا فیصلہ اسے‘ ای دا کیس ءِ بننگ کپرہ۔ یات سلے کہ چیف جسٹس آف پاکستان داکان مست باندات نا سماعت کن 9باسکی بینچ ٹہیفیسس۔ جسٹس قاضی فائز عیسیٰ و جسٹس سردار اطراف مسعود باندات نا اولیکو سماعت نا وخت آ تینے بینچ آن جتا کریسس۔ ہراکان گڈ 7باسکی بینچ باندت نا کارروائی ءِ مونی درے‘ داسہ بنجائی حکومت نا کنڈآن منصور علی شاہ غا اعتراض مننگ آن پد 7 باسکی لارجر بینچ ہم پنا۔

(آن لائن)