نیاڑی نا ردوم نا سفر اٹ اونا بانزل

نیاڑی اُرا نا زیب ءِ، دا ہیت اٹی ہچ شک اف، نیاڑی لُمہ و باوہ نا غمخوار مریک، ایڑھ و ایلم تا دوستخواہ مریک، اسہ جوان ءُ زئیفہ اس، مہربان ءُ لُمہ اس۔ دا کُل زمواری تے او اُست انا ہُب اٹ سر ایتک۔ نیاڑی ءِ خُدا بے شک اسہ بھاز بھلو ہند اس تِسنے، ولے ننا راج اٹی نیاڑی ءِ تینا زند اٹی بھاز انگا گِڑا تے سگوہی تمک، وخت بے شک بھاز مونی ہنانے، مخلوق اٹی بھاز شعور ودی مسنے، اسہ وخت اسے ٹی ہرا بلوچ آک مسِڑ ءِ خوانفِنگ ءِ میار اس تکارہ، اینو تینا مسِن تے اُست بڈی اٹ خوانفنگ ءُ، اینو نا دا ساڑی اِنگا وخت اٹی بلوچ آتا اُرا نا پھل آک اُرا غان پیشن خواننگ کن تینا گام تے ہرفینو، ہرافتیان بھاز آتا پِنک تیوی راج اکن گمر نا سوب ءُ۔ ولے اینو نا دا ساڑی اِنگا وخت اٹ ہم نیاڑی تینا ردوم نا سفر اٹ بھاز انگا خواری تیان گِدرینگک، اُرا نا کُنڈ آن اگہ لُمہ باوہ اودے پیشن خواننگ کن راہی کیرہ، ہم تو پیشن نا چاگڑد نا خُلیس اوفتا اُست اٹ مریک، اُرا و خاہوت آن پیشن خواننگ کن ہنوک آ مسِڑ آ تیوی خاہوت نا خنک سخت مریرہ، دنیا اخہ در ہم مون آ ہنسا ءِ، ولے نیاڑی نا زِند انا ردوم نا سفر اٹی اینو ہم اودے بھاز اِنگا خواریک مون تروک اریر۔ ارا غان پیشن ہِنوک آ خوانوک آ مسِڑ مرے یا ڈیوٹی کروک آ نیاڑی ہڑتوم آتا زمواریک نرینہ غان زیات مریرہ، انتئے کہ مسِڑ و نیاڑی آ پیشن نا کاریم و زمواری تتون اوار تیوی خاہوت نا زمواری ہم مریک، وخت اس اودے اُرا والا تا کُنڈ آن ہمو سیبو رسینگپک ہرا اودے درکار مریک، ولے ولدا ہم او جوانی اٹ تینا کاریم ءِ کیک، داکان بیدس اگہ نن ہُرن پیشن ہنوک آ کاریم کروک آ نیاڑی ءِ پیشن نا ہم بھاز انگا رویہ غاتے سگوئی مریک، بھاز آ ہیت آتے بِنوئی مریک۔ او تینے بھاز اِنگ آ جاگہ غاتیا کر کیک، بھاز اِنگا ہیت آتے سگک، او پیشن نا مخلوق آتا غُٹ ہیت آتے بِننگ نا تاغت ءِ تِخک۔ ولے تینا اُرا نا باتیک اگہ اونا کاریم، اونا خواری، ءِ منپس، اودے شیف خلیر، گڑا دا ہیت اودے اونا رُدوم نا سفر اٹ مون آ اِلیپک۔

نیاڑی نا رُدوم نا سفر اٹ اونا کُل آن بھلا سیبو، بانزل، کوپہ اونا ارا نا باتیک ءُ، اُرا نا ہر فرد ہر باتی نا زمواری ءِ کہ او تینا اُرا نا نیاڑی نا ردوم و سرسہبی نا سفر اٹ جوانی اٹ اودے سیبو تیر، اوڑتون اوار ہر مُشکل انگا ساہت اٹ سلوک مریر۔

ہفتئی تلار
تاک: 12
26-20 مارچ 2021ء
پنہ: 3