خڑکی ٹی مُری انتئے؟ (افسانہ)۔

ای کہ وخت اس نمے اسکان تینا جون ءِ سر کننگ نا جت پت اٹ…… نمے سوچاٹہ…… نما سیخا ٹی تینا زند انا ہنین آ تغ تے پٹاٹہ، تینا روح انا ملاسی ءِ نما مہر آتا چکل آن مُر کننگ کن سہب شام نما خیال آتتون دو لخی کرسا نما گمان تون گم گار مسٹہ، کہ وخت انا بھلا پٹ کنے نمے اسکان امر سر کرو، کنا سہب شام نا دعا نمے آن بنا کریکہ، نمے آ ایسر مسکہ۔ ای تینا زند انا مسخت ءِ بیرہ نما مہر اٹ پٹاٹہ، نما مہر اکن نمے آ سر مننگ کن وسیلہ پٹاٹہ، ہندا پٹ سٹ تو کنے زندہ تخاکہ۔ ہنداٹی تو ای تینے زندہ گمان کریٹہ، وخت انا بھلا چِٹ ءِ گونڈ کننگ کن ای بھاز وخت تینے آن ہم اسل مُر ہناٹہ، ولدا ہندا نما گمان اٹ تینے نمے ٹی پٹنگ نا کوشست ءِ کریٹہ…… ولے ای ای سلتوٹہ…… ای بیرہ نم مسٹہ، و نما خڑکی ءِ تینا وجود نا پوروی تکاٹہ۔

وخت انا شابیت آ پٹ اٹ، پند کرسا کرسا وخت اس وخت ءِ ہم بندی کننگ نا کوشست ءِ کریٹہ، کہ وخت ہم ہموکان بِنا کے ہراکان کنا نما اواری و خڑکی نا ساہت آک بنا کیر، و ہموڑے وخت ہم سلے و ای و نی وخت انا زندان اٹ اوار ہندُن مرین کہ وخت ءِ ہم سما تمے کہ ای و نی اسہ روح اسہ جون۔

بس ہندا سہب شام انا نیام اٹ بیرہ نا احساس کنے ٹی تیوئی زند انا رنگ آتے خوندی کننگ ئس۔ ہندا ڈیوا کنا ذات ءِ روشنا کننگ ئس، ای ہندا زیبا غا احساس تون تینے چندی وخت آتا پند آن گڈ نے اسکان سر کریٹ۔

ہندا تینا احساس نا تُرند آ نوکاپ اٹ نما جوزہ غاتے وہفیٹ و نمے اسکان سر مسٹ، نن ہرا وخت کہ اسہ ایلو آ سر مسن تو اسہ ایلو نا مہر آتتون ہندُن دولخی مسن کہ اسہ ایلو ٹی اوڑدہ غا ساہت آتیٹی ننا نیام اٹ اسہ پُٹ اسے نا کچ مُری ہم سلتو…… داسہ ہندا ساہت آتا گمان ہندُن مس کہ وخت سلیس۔ دے، توبے، استار، پھل، بلبل…… ہر زیبا غا ندارہ نا خنک ننے ٹی خلوک ننے آ ناز کننگ ئسر۔ نن تین کن اسہ ہندن ءُ جہان اس جوڑ کننگ اٹ سرسہب مسن، ہراٹی نا و کنا مہر آتیان بیدس ہچ اس الو، نئے دنیا نا ہَوس نئے دنیاداری، وخت ہندُن مہروان ئس کہ منہ ساہت انا مُری ہم ننے کُنگکہ۔ نما جوزہ غاتا طوفان ءِ بش کننگ اٹ ہم ای پبی سرسہب مسٹ، ولے ہرا وخت کہ نما خڑکی کنے نصیب مس، نما اواری ٹی ای دم ہلنگ نا بِنا ءِ کریٹ، داسہ وخت بیرہ نما احساس و نما جوزہ غاتیٹی مدام روان مس۔ ای داسہ نما لمس انا احساس اٹ وہنگ ءِ بنا کریٹ۔ تینا گنوکی و تینا عشق اٹ نمے ہم تینے ٹی گم کننگ اٹ نما مہر ہم تینا معراج آ سر مس۔ داسہ نن تینا اواری آ ناز کرینہ، تینا دامون ایمون بیرہ اسہ ایلو آن پین ہچ اس خنتونہ، منہ ساہت انا مُری ننے دوشہ غانبار کُنگکہ، نن تینے ٹی ہندن گم مسن کہ اسہ ایلو نا ساہ اٹ دم ہلکنہ، اسہ ایلو نا احساس اٹ ہندُن گم کہ نن اسہ ایلو آن خڑک متون ہم، اسہ ایلو نا روح جون اٹ خوندی…… دا خڑکی ہنداخس ئس کہ ننا وجود اسٹ، ننا روح اسٹ، نن اسہ ایلو نا زند جوڑ ئسُن۔ ہراتم مُری نا گمان تینا خن تے کشاکہ تو ہندا سوچ کہ نن مُر مرون چندی نن ننا تغ پرینگاکہ۔ اُست لڑزاکہ، اسہ بھیم اس ننا اُست آتے ترخفیکہ، ولے ننے اسہ ایلونا مہر آ ہنداخس گمر ئس کہ وخت حالیت آتا دا آسیاب ہم ننے اسہ ایلو آن مُر کننگ نا گمان ءِ کتوکہ۔ وخت آک ہندن تُرندی اٹ گام کریرہ کہ وخت اس ہندن گمان مسکہ کہ ننا مہر اکن دا زند ہم بھاز کم تمنگ ءِ۔ وخت تینا رفتار تون چرخ کرسا اسہ وار اتون ننے تینا زندان آن ہندن آجو کرسا چغل تِس خسا کہ اسٹ ننا روئے زمین نا اسہ کُنڈ مُر ایلو پارہ غا ننا ہَروہ غاک شیشپہ شیشپہ مسر، جون ننا اسہ ایلوڑتون ساڑی تو ئس ولے ننا ہَروہ غاک اسہ ایلو آن بھاز مُر تماسُر۔ داسہ او کن تون ءِ ہم، اونا ہَروہ سوچ پام کن تو اف، نن بیرہ روایتی اسہ ایلو ءِ خننہ تولنہ بش مرینہ۔ ولے ننا جوزہ غا تے دنیا نا نظر لگا، یا راج انا۔ ہچ سما اف۔ اینو ای تولوک ہندا سوچوہ کہ مگہ نن مُر ئسُن؟ تو اسہ ایلو کِن ملاس…… خڑکی نا واج پٹانہ۔ داسہ کہ ہندُن خڑک مسن، چٹ اسہ ایلو ٹی اوڑدہ…… داسہ کنا اپاخ آک پرینگوک ءُ، خنک کنا زڑرہ، چڑہ، ہندا سوچوہ کہ مگہ نن خڑک مسن مُر مننگ کن، تا کہ مُر ئسُن اسہ ایلو کِن چٹ گنوک…… داسہ کہ خڑک مسن تو اسہ ایلو آن انتئے داخہ مُر کہ اسہ ایلو کن سکنہ۔۔۔۔۔