السی جماعت ہمودے ہر وڑ انا بیداد نا مون آ سلیس،مریم نواز

سرگودھا : پاکستان مسلم لیگ ن نا سنیئر نائب صدر مریم نواز پارینے کہ ہرا جماعت ہر وڑ انا بیداد نا مون آ سلیس ہمو السی جماعت ءِ۔ ن لیگ والاک پک کریر کہ او نئے زندان آن خلیرہ و نئے کاٹم ءِ شیف کیرہ۔ حوال نا رد اٹ چیف آرگنائزر مسلم لیگ ن مریم نواز نا کماشی ٹی ن لیگ سرگودھا ڈویژن نا تنظیمی دیوان اڈہلک‘ دیوان اٹ سرگودھا ڈویژن اٹ پارٹی نا تنظیمی بنچر و کارکڑد نا جاچ ءِ ہلنگا۔ مریم نواز شریدار آتتون ہیت وگپ کرسا پارے کہ نمے آنبار ءُ کارندہ مریر تو ہر مشکل تون مون تننگ کینہ‘ پارٹی ٹی ہر کہول آ زالبول آتا نمائندگی ءِ ودفنہ‘ کارندہ و عہدیدار آتا شرف تننگ آ اوفتا منت ءِ ہرفوہ۔ اوپارے کہ تنظیم سازی ٹی اسہ بے مٹ ءُ جماعت اس جوڑ مروئی ءِ‘ السی جماعت ہمودے ہرا ہر وڑ انا بیداد نا مون آ سلے۔ ن لیگ والاک پک کرینو کہ او نئے زندان آ ہننگ آن خلیرہ و نئے الس نا حق آتیان پدی مریرہ۔

(آن لائن)