بلوچستان حکومت قلمکار آتے گوجالنگ اٹی ءِ، حاجی شاہ بیگ شیدا

کوئٹہ : بلوچستان نا پنی آ شاعرادیب آماچ ادبی دیوان نا صدرسوشل اکٹیوسٹ ساڑی دور ”یک پہ ٹک“ انا تخلیق کار حاجی شاہ بیگ شیدا 23 فروری آ سیکریٹری کلچر جناب منظور حسین تون اونا دفتر اٹ اوڑدہی کرے۔ ہراڑے اوڑان بیدس ڈائریکٹر کلچر داؤد ترین و ایلو اسٹاف ہم ساڑی ئس۔ سکریٹر ی کلچر اودے جوان وڑاٹ حال احوال کرے و ادبی کاریم و ادبی ویل آتا بابت معلومداری کرے۔ شاہ بیگ شیدا جوان وڑاٹ ادب و شاعر تا ویل آتیان معلومدار کرسا پارے کہ بلوچی فارسی پشتو براہوئی سرائیکی اردو ھزارگی نا پنی آ شاعر و قلمکار جوان پٹ وپول آن اُلسی شعور ءِ بڑز کننگ کن دے و نن اختہ ءُ۔ ولے بلوچستان گورنمٹ و نما محکمہ نا کنڈآن ہمو ستا دوئی اف۔ ہراوڑ ملک انا ایلو صوبہ غاتا قلمکار آتے دوئی ءِ۔ دا صوبہ نا مالو نا گورنمنٹ قلمکار آرٹسٹ و گلوکار آتا بیروزگاری و فلاع و بہبود کن بھلو پیسہ اس منظور کرے داڑان نما محکمہ قلمکار آتے اسہ کنڈ کرے انتئے کہ قلم کار اگہ پٹ وپول کتو تو آرٹسٹ و شیئر پاروک انت اس خلیک۔ جناب سیکریٹری صاحب اونا ہیت اتون امنا کرسا پارے کہ راج ءِ جوان کروک آک قلمکار مریرہ ہندا قلمکار آتا گران قدر ادب ءِ خوانسا ننے دا ہند دوئی مس۔ شاہ بیگ شیدا ہیت ءِ پین حکومت بلوچستان آ پاش کرے کہ معزور ناجوڑ بیروزگار قلمکار و شاعر آک گڑاس اریر اوفتا خیالداری، ناجوڑی حکومت کن بوج اس مفک۔ مستی او پارینے کہ دا ویل آ خوڑتی اٹ لائحہ عمل اس جوڑ کرسا بڑزکو کمامدار آتے پیش کینہ۔ شاہ بیگ شیدا اہل قلم نا کنڈآن اونا شفیقانہ رویہ نا منتواری ءِ ہرفسا پارینے کہ نمے آنبار انگا مہربانک ننا کمکار مریرہ۔

(تلار حوالکار)