لمہ ڈغار سیندک(افسانہ) 

اونا ہمے مہالو نا رنگ ہرا کہ اسپیدہ نا پوشکنی آنبار ئس۔۔۔ اگہ ای اونا ہندا زیبا غا رنگ ءِ زعفران نا پوشکنی پاو ہم تو کنا دا ہیت ردینک اس مفرو ءِ۔۔۔ انتئے کہ اونا جون و ہروہ تون صبر و برداشت سنگتی گنڈانے۔۔۔ اونا شابیت آ سینہ ٹی لال و گوہر مرواریک تالان ءُ۔۔۔ ولے اینو اونا صبر انا پیالہ چلک ہلسا پناسس۔۔۔ اینو اونا سگ تینا گڈیکو دنگ آ ئس۔۔۔ داسہ اونا ہمے زعفرانی آ رنگ مَون ہڑسینگاسس۔۔۔۔ اونا ہر چیہانٹ آن اسہ پین چہانٹ اس ودی مسکہ۔۔۔ ہرانا توار گٹ و تلار و زیبا غا تنک انگا مش تا بڑزی ٹی لگسا و پنسا پین دڑدی ءُ چیہانٹ اس مسکہ۔۔۔ ولے کنا خف تیٹ پمبہ ئس۔ ای دا دڑدی آ چیہانٹ ءِ بیرہ چیہانٹ اس سرپند مسٹہ۔۔۔ ہرانا کڑمبی نا کنے اسل سما تمتوکہ۔۔۔ اینو اونا خن تیان بے کچ خڑینک وہاکہ۔۔۔ اونا ہندا وہوک آ سور انگا خڑینک آک اونا چہرہ ءِ ٹھپی کریسر۔۔۔ داسہ اونا شابیت آ سینہ بروے آنبار ٹنگ ٹنگ ئس۔۔۔ خرماک اونا جون ءِ تینا شل انگا زیل تیٹ ہر پارہ غان چانخور کریسر۔۔۔ داسہ اونا استخوان آن ہم بھاز خڑک تماسر۔۔۔ او ہر گام آ ترند ءُ ہڑکی خلسا ئس۔۔۔ اونا ہندا ترند انگا دم تا توار اونا سینہ ٹی تاب کنسا ہندن پیش تماکہ۔۔۔ دن کہ دم کشتہ ءُ بلبل اس باغ اسے ٹی با پست خلے۔۔۔۔ اونا ہندا چیہانٹ و خڑینک آتیان کنا تہہ انا بندغ تینے اسل ہیجتوکہ۔۔۔ اونا دامن تار تار اونا گد ریڑ ریڑ ئس۔۔۔ اونا نت تا تلف آک پوتڑو کریسر۔۔۔ اونا دوک رسم انا بے رحم آ زمزیر اٹ تفوک ئسر۔۔۔ اونا بادوی آ قلف خلوک ئس۔۔ ولے اونا تہہ انا جیرت و ہمت ہندا آہنی آ قلف آتے پرغنگ اٹ سرسہب مسوسس۔۔۔ داسہ کنے آن او اسل بھاز خڑک بس۔۔۔ ولدا ای تینا جان بڈی ءِ گوہسا دوتے ڈغار اٹ تسٹ اونا مون آ بش مسٹ کہ اونا ریڑ ریڑ مروک آ گد انا پلو اٹ اونا گیمرونگوک آ چہرہ غان اونا خڑینک آتے سفا کیو۔۔۔ ولے او کنا دو ءِ چنڈی ترسا خسا کنے پارے نا دا دوکنا درّ انگا خڑینک آتے سفا کننگ نا آخا بلکن گڈنگ نا لائخ ءِ، تو کنا جون اٹ کنا ڈکوک آ ضمیر ہُور کرے۔ سفا کنا اپاخ آک پرینگار۔۔۔ کہ زند اٹ کس کنے دن سدھا ملامت کرسا پاتنے۔۔۔ ولدا اونا ہمو دڑدی آ چیہانٹ پین ہم دڑدی مرسا ہنا۔۔ جیرت آن اونا خنک چیلکی آ گروک آنبار مسر۔۔۔ داسہ اونا ہر چیہانٹ اٹ غذب نا چیہانٹ اس ڈکوک ئس۔۔۔ ولے ولدا ہم ای اسل سرپند متوٹہ۔۔۔ داسہ او ترند آن کنے ہکل ترسا پارے ”او تنگان! سما کر۔ ولدا ہرا وخت سما کروس۔۔۔“ 

ای اودے پاریٹ ”کنے تو سما ءِ۔۔۔“ ولے او تینا ٹھپ مروک آ چہرہ غا دڑد انا بشخندہ اس تالان کرے۔۔۔ 

پارے ”اگہ نے سما مسکہ تو اینو ہمے چل سال مہالو نا کنا شابیت آ سینہ دن دا ڈول تنک متوکہ۔۔۔ ای تینا ہمے سبر آ جون و بڑز انگا بالاد تون دن پاٹ آنبار لاغر متوٹہ۔۔۔۔ کنا ہمے زعفرانی آ چہرہ دن ہس آنبار مون ہڑسینگتوکہ۔۔۔“

ولے داسکان ہم دا سرپند متوٹہ کہ دا دیر اسے۔۔۔ داسہ ای اوڑان ارفیٹ کہ ”نی دیر اسے اس کہ دن چیہانٹ خلیسہ ہوغسہ و کنے آن گلہ کیسہ۔۔۔“

ارمان آن او تینا چیر چیر مروک آ گد انا پلو ءِ باٹی تس۔۔۔ غیرت آن اونا خن تا خیسنی زیات مرسا ہنا۔۔۔اونا لاغر آ جون داسہ اسل بھاز لڑزہ ٹی بس۔۔۔ اونا لاغر آ دوک لڑزسا اسہ ایلو ٹی لگارہ۔۔۔۔ داسہ او مون مقابل راسکوہ نا مش انا ٹل آ لگا کنے ترند آن چیہانٹ خلسا تینا پارے۔۔۔ ولے داسکان ہم ای اونا توار ءِ کئے کننگ کتوٹ۔۔۔ او اسہ وار ولدا زیبا غا راسکوہ نا مش انا ٹل آن دڑسا کنا ماس آ بس۔۔۔ داسہ کنا زنچک اٹ ہلک کنے ترند آن چنڈی تس۔۔۔ داسہ ای تینا بت اتون سفا مٹ اس مش انا مسٹ کنا خنک شیف ڈغار اٹ سخت مسر۔ او کنے اسہ وار ولدا ترند آن چیہانٹ خلسا و ہکل ترسا پارے۔۔۔

”ای نا لمہ ڈغار سیندک اُٹ۔۔۔“

اسہ وار اتون ای پرانگا تغ آن اترم کرسا سما کریٹ دانگ اینگ ہراٹ ہچ اس الو۔۔۔بس ای ئسٹ راسکوہ نا زیبا غا مش ئس ہرانا پاناد آ ای تنگان ہناسٹ۔

ہفتئی تلار 

تاک: 39

10-16 Oct, 2020

پنہ: 03