بلوچستان نا کیہی ضلع غاتیٹی پر، جلک دیر ایسر، بجلی و گیس گار

کوئٹہ: کوئٹہ تون اوار بلوچستان نا کیہی ضلع غاتے ٹی ہورہ گروک اٹ پِر تا چرجوئی برجاءِ‘ پِر نا سوب آن جلک دیر ایسر‘ بجلی نا نظام درہم برہم مس‘ محکمہ فشریز گمانی تہو و پر انا سوب آن 24 مارچ اسکان سور دریاب اٹ ہنپننگ نا الرٹ جاری کرے‘ محکمہ موسمیات بروک آ 72گھنٹہ اسکان صوبہ نا چندی ضلع غاتے ٹی پِر انا پیش گوئی کرسا تعلقدار ادارہ غاتے الرٹ مننگ نا پارت کرینے‘ محکمہ موسمیات نا رد اٹ صوبہ نا کیہی ضلع غاتے ٹی دیکی آن تیز ءُ تہو پتینگانے‘ ہرانا سوب آن بروک آ 24گھنٹہ ٹی کیچ، گوادر، لسبیلہ، آواران، واشک، سوراب، پنجگور، ہرنائی، زیارت، پشین، بولان، سبی،ژوب، کوئٹہ، بارکھان، کو ہلو، ڈیرہ بگٹی، نصیر آباد، شیرانی، قلعہ سیف اللہ، قلعہ عبداللہ ٹی ہورہ گروپ تون اوار پِر انا گمان ارے۔ محکمہ موسمیات نا رد اٹ ہرنائی، زیارت، پشین، بولان، سبی،ژوب، کوئٹہ، بارکھان، کوہلو، شیرانی، قلعہ سیف اللہ، قلعہ عبد اللہ، مو سیٰ خیل، دکی ٹی بروک آ 48 آن 72گھٹنہ اسکان ترنگڑ و ترند پِر انا گمان ارے ہرانا سوب آن نوکاپ نا حالیت ودی مننگ کیک۔ محکمہ موسمیات دا وخت آ کل تعلقدار ادارہ غاتے الرٹ جاری کرینے۔ محکمہ موسمیات نا رد اٹ پسنی ٹی 40، تربت اٹ 17ملی میٹر پِر ریکارڈ کننگا۔ محکمہ موسمیات نا رد اٹ پنچ شنبے آ کوئٹہ، ژوب، بارکھان، سبی، جعفرآباد، نصیرآباد، زیارت، چمن، پشین، جیوانی، لسبیلہ، دالبندین، قلات، خضدار، تربت، آواران، پنجگور،کیچ، گوادر، پسنی و مکران اٹ ترند تہو و ہورہ گروک اٹ پِر تا چرجوئی برجا سلیس۔ زیارت دامان و ایب کیب اٹ وقفہ وقفہ اٹ پِر و ترونگڑ نا سوب آن ڈغار ومشک پیہن مسر۔ سنجاوی نا علاقہ چوتیر بٹے تیر کاڑہ طور غر سنجاوی ٹی ہم پِر انا تون اوار ترونگڑ نا سوب آن مش و ڈغار پیہن پیہن مس‘ سڑک آتیا ٹریفک مشکل مس و گاڈیک پاسینگار۔ زیارت سنجاوی ٹی پِر و برف آنبار انگا ترنگڑ ناسوب آن یخ ودا۔

(آن لائن)