ڈبلیو ایچ او و بلوچستان حکومت نا نیام اٹ 6 معاہدہ غا دستخط

کوئٹہ : جہانی جانجوڑی ادارہ (ڈبلیو ایچ او) و محکمہ جانجوڑی بلوچستان نا نیام اٹ 6معاہدہ غا دستخط کننگا‘ جہانی جانجوڑی ادارہ نا سروک ڈاکٹر پلیتا ماہی پالا پارے کہ صوبہ نا ہسپتال آتے ٹی سولر سسٹم خلنگ تون اوار نوکاپ آن زہمی ضلع غاتے ٹی 100 جانجوڑی نا بنداوی ہندجاٹ آتے ٹی آسراتی فراوان کننگک و دا ڈٹ آتے شش تُو اٹ پورو کننگک‘ دا ہیت آتے او کوئٹہ ٹی اڈ ہلوکک ای پی آئی آفس اٹ جہانی ادارہ جانجوڑی (ڈبلیو ایچ او) و محکمہ جانجوڑی بلوچستان نا نیام اٹ چندی معاہدہ غاتیا دستخط کننگ نا دود آن تران کرسا کرے۔ دود اٹ صوبائی وزیر جانجوڑی احسان شاہ، سیکرٹری محکمہ جانجوڑی صالح ناصر، ڈائریکٹر جنرل محکمہ جانجوڑی نور قاضی تون اوار محکمہ جانجوڑی و ڈبلیو ایچ او نا نمائندہ غاک بشخ ہلکر‘ معاہدہ غاتیا دستخط نا عمل پورو مننگ آن پد صوبائی وزیر سیداحسان شاہ ڈبلیو ایچ او نا کمامدار آتا منت ءِ ہرفے و پارے کہ ڈاکٹر پلیتا ءِ بلوچستان آ بننگ آ بخیرٹ پانہ و ڈبلیو ایچ او بلوچستان اٹ نئے بیرہ مشینری بلکہ دارو تے ٹی ہم کمک کرینے ہراڑکن نن اونا منتوار ن۔ ڈاکٹر پلیتا ماہی پالا و اونا ٹیم انا منت ءِ ہرفوہ ہرا کنا حلقہ نا بندغ آتیکن سٹی اسکین مشین عطیہ کرینے ہرانا نہاد پاکستانی کرنسی ٹی 15کروڑ اسکان مریک ہراڑکن ای تینا علاقہ نا کنڈآن ڈاکٹر پلیتا نا منت ءِ ہرفوہ۔ دود آن تران کرسا ڈاکٹر پلیتا ماہی پالا پارے کہ بلوچستان ءِ اسہ پیکیج اس تننگ اٹی ان صوبہ نا چندی علاقہ غاتے ٹی جوڑ جانجوڑی نا بنداوی ہندجاٹ آتے فعال کننگ کن ہم معاہدہ مسنے۔ دود آن تران کرسا ڈاکٹر پلیتاماہی پالا پارے کہ بلوچستان حکومت و ڈبلیو ایچ او نا نیام اٹ اہم انگا معاہدہ غاتیا دستخط مسنے۔ ڈبلیو ایچ او و محکمہ جانجوڑی نا نیام اٹ دستخط مروک یاداشت نا رد اٹ ڈبلو ایچ او بلوچستان نا نوکاپ آن زہمی 12ضلع ٹی جانجوڑی نا سَد ہندجاٹ جوڑ کننگ وبحالی نا گام گیج کیک داڑتون اوار ڈبلیو ایچ او زہمی ضلع غاتے ٹی محکمہ جانجوڑی نا ہندجاٹ آتا جوڑ جاڑ و زیبائی‘ طبی ازباب‘ فرنیچر و سولر سسٹم نا فراوانی ءِ پک کیک۔ ڈاکٹر پلیتاماہی پالا پارے کہ محکمہ جانجوڑی ہسپتال آتے ٹی کاریم کروک آتا ساڑی گری ءِ پک کننگ تون اوار جانجوڑی نا ہندجاٹ آتے ٹی آسراتی تا فراوانی ءِ پک کیک۔ او پارے کہ ڈبلیو ایچ او نا کمک اٹ ای پی آئی آفس اٹ دارو تا رکھنگ کن کولڈ اسٹوریج کمرہ تفنگک ہرانا رد اٹ محکمہ جانجوڑی ءِ سال انا 80 ملین روپئی پٹرول کن تروئی تمک وخت اس کہ دا کل ڈٹ آتے بروک آ شش تُو اٹ پورو کننگک۔ دود آن تران کرسا صوبائی سیکرٹری محکمہ جانجوڑی صالح ناصر پارے کہ بلوچستان اٹ 6درملکی ادارہ کاریم کننگ اٹی ءُ و دا کل ادارہ غاک اسیجائی و جوان وڑ اٹ کاریم کننگ اٹی ءُ‘ حکومت بلوچستان و غیر سرکاری تنظیم تامنتوار ان ہرافک نن تون کمک کریر و کننگ اٹی ءُ انتئے کہ محکمہ جانجوڑی تون داخس وسیلہ اف کہ محکمہ نا ادارہ غاتے تینا نت تیا سلفنگ کے۔ داوخت آ سیکرٹری جانجوڑی ڈاکٹر پلیتاماہی پالا سیکرٹری جانجوڑی آن خواست کرے کہ دا وخت آ سرویلنس آفیسر آتے گاڈی تا گرج ءِ ہرا ہرا بندغ آتے گاڈی تننگ انگ ءِ اول اٹ اوفتا متکن آ گاڈی تے پدی ہلوئی مریک۔

(آن لائن)