یومِ پاکستان ربیدگی جم و جوش اٹ اڈ تننگا، دفاعی پریڈ پد تما

اسلام آباد: قراردادِ پاکستان پیش کننگ نا 83 سال پورومننگ آ مچ آ ملک اٹ شونداری‘ شونہالی و ملک انا سوگو رکھ ءِ پک کننگ نا عزم اتون اوار ’یوم پاکستان‘ پبی جم وجوش اٹ اڈ تننگا‘ وخت اس کہ موسم نا خرابی نا سوب آن دفاعی پریڈ ءِ ملتوی کننگا ہراکہ داسہ پگہ 25مارچ ہفتہ نا دے آ مریک۔ لاہور اٹ یوم پاکستان نا وخت آ مزار اقبال آ گارڈ آتے بدل کننگ نا دود اڈ ہلک‘ ایئر وائس مارشل سید عمران ماجد علی دود انا خاص انگا مہمان ئس‘ پاک فضائیہ نا چاک وچوبند دستہ مزارِ اقبال آ اعزازی گارڈ انا زمواری تے دوئی کرے‘ مزار اقبال آ سلامی ہم پیش کرے و دعا پاتیہ ہم کرے‘ دا وخت آ ملک و قوم انا سلامتی کن خصوصی دعا ہم کننگا۔ اسلام آباد اٹ دے انا بنا 31 توپ انا سلامی آن مس وخت اس کہ صوبائی دارالحکومت آتے ٹی 21 توپ انا سلامی تننگا‘ دا دے انا اہم انگا خصوصیت اسلام آباد اٹ مروک شاندار فوجی پریڈ ءِ ہراٹی ہر مسٹ آسلہہ بند فوج و ایلو سکیورٹی فورس آتا دستہ غاک مارچ پاسٹ وخت اس کہ جنگی جہاز آک فضائی مشق آتا درشانی کیرہ۔ ایوان صدر ناحوالی نا رد اٹ زرگزرانی حالیت آتا سوب آن دا سال پریڈ ءِ کچ اٹ کرسا پریڈگراؤنڈ آن ایوان صدر آ گدریفنگاسس ولے موسم نا خرابی نا سوب آن ایوان صدر اٹ مروک پریڈ ءِ ملتوی کننگا ہراکہ داسہ 25 مارچ ہفتہ نا دے مریک۔ 83می یوم پاکستان دا وار رمضان المبارک نا برکتی آ تُو انا بنا ٹی مسنے ہرا دا ہیت ءِ یات کرفک کہ پاکستان ہم رمضان المبارک نا تو اٹ جوڑ مسوسس۔ دا دے 23 مارچ 1940 آ تاریخی قرارداد لاہور نا منظوری نا یات اٹ اڈ تننگک ہرانا رد اٹ برصغیر نا مسلمانک تین کن جتاءُ وطن اسے نا ایجنڈا ءِ پک کریسر۔ تحریک پاکستان نا وخت آ 23 مارچ 1940 ہمو دے ئس ہراتم مولوی فضل الحق قائداعظم محمد علی جناح ناکماشی ٹی اسہ آجو وطن پاکستان کن قرارداد پیش کرے و ہمو رد اٹ نن قوم اسے نا وڑ ہر سال 23 مارچ ءِ یوم پاکستان نا وڑ اٹ اڈ ایتنہ۔

(آن لائن)