امریکی کانگریس اٹی 23مارچ ءِ یوم پاکستان گوندنگ نا قرارداد پیش

واشنگٹن: پاک امریکہ تعلقداری تا تاریخ اٹ اولیکو وار اسہ تاریخی قرارداد اس ایوان نمائندگان اٹ پیش کننگا ہراٹی کانگریس نا باسک جمال بومن 23 مارچ 2023 ءِ یوم پاکستان نا وڑ اٹ امنا کرے تاکہ پاکستانی، امریکی کمیونٹی نا اہم انگا کڑدار ءِ امنا کننگے۔ قرارداد اٹ پاننگا کہ امریکہ کن دا جوان و درکار ءُ ہیت اسے کہ او ہمو بندغ آتے خراج تحسین پیش کے ہرا ربیدہ ئی وڑ تے شون ترسا امریکہ ٹی ساڑی جتا جتا کمیونٹی تا نیام اٹ تعلقداری تے سوگو کننگ اٹی ءِ ہراڑان ریاست ہائے متحدہ امریکہ نا کمیونٹیک سوگو مریرہ۔ قرارداد اٹ پاننگانے کہ یوم پاکستان اسہ گچین ءُ وارخواہی اس فراوان کیک کہ ہرانا کمک اٹ امریکہ نا باتیک پاکستانی میرات نا بارو اٹ تینا آگاہی ءِ ودفنگ کیرہ‘ وبروک آ نسل آتے ٹی دا تاریخی ربیدہ نا بارو اٹ معلومداری ءِ شون تننگ کیرہ۔ داکان بیدس امریکہ ٹی پاکستان نا سفیر مسعود خان کانگریس مین بومن نا ہمو گام آ اونا منت ءِ ہرفے ہراٹی او پاریسس کہ داڑان نئے بیرہ ہڑتموم آ ملک آتا تعلقداری تے پین سوگو کننگ اٹ کمک رسینگک بلکہ ہڑتوم آ ملک آتا الس ءِ اسٹ ایلو آن خڑک اتنگ اٹ ہم کمک رسینگک۔ او امریکن پاکستان ایڈووکیسی گروپ نا سرکڑدہ واونا صدر و ممتاز کمیونٹی لیڈر علی راشد وایلو عہدیدار آتا ہم منت ءِ ہرفے ہرافک دا تاریخی قرارداد ءِ درستی راستی کرفنگ کن کانگریس نا باسک اتون رابطہ کرسا بھاز خواری کریر۔ او پارے کہ 23 مارچ 2023 ءِ یوم پاکستان نا وڑ اٹ امنا کننگ و پاک امریکی شاری تا خذمت آتے امنا کننگ پاک امریکہ تعلقداری تا اہمیت و اوفتا تعلقداری تے پین سوگو کننگ نا استخواہی تا درشانی ءِ کیک۔ مسعود خان تینا چیمبر اٹ کانگریس مین بومن تون اوڑدہی ہم کرے‘ ہرا اودے جم وجوش اٹ بخیر کرے و تعلقداری تا اہمیت و تعلیم‘ طب، سائنس، ٹیکنالوجی، کاروبار و صنعت تون اوار چندی بشخ آتے ٹی پاکستانی باتی تا اہم کڑدار نا بارو اٹ تینا خیال آتا درشانی ءِ کرے۔

(آن لائن)