بیرہ 2 صوبہ ٹی جتا گچین کاری جھیڑہ ئی مسکہ، مریم اورنگزیب

اسلام آباد: بنجائی وزیرحوالکاری وشینکاری مریم اورنگزیب پارینے کہ 30 اپریل آ 2 صوبہ ٹی گچین کاری مسکہ تو مدامی جھیڑہ ئی مسکہ‘ الیکشن کمیشن کل اسٹیک ہولڈرآتتون سلابت آن پد ہرا فیصلہ ءِ کرے داڑان پاکستان ءِ فائدہ ءِ۔ تینا بیان اٹ مریم اورنگزیب کا پارے کہ آئین نا آرٹیکل 218 نا رد اٹ الیکشن کمیشن ءِ پک کیک کہ شفاف، کنڈہلپروک و انصاف آ ساڑی گچین کاریک مریر‘ آرٹیکل 224 نا خواست ءِ کہ گچین کاری تا وخت آ بنجا و صوبائی اکائی تے ٹی نگراں حکومت آک مریر‘ ا و پارے کہ قومی اسمبلی نا گچین کاریک مسر تو 2 صوبہ ٹی حکومت جوڑ مریک‘ 30 اپریل آ 2 صوبہ ٹی گچین کاری مسکہ تو مدامی جھیڑہ ئی مسکہ‘ الیکشن کمیشن کل اسٹیک ہولڈر آتتون سلاہ کرسا دا فیصلہ ءِ کرے‘ فیصلہ غان ملک اٹ سیاسی سوگوی نا ضمانت رسینگک۔ بنجائی وزیر پارے کہ الیکشن کمیشن تینا فیصلہ غان ملک ءِ بھلو آئینی تنکی اسے آن بچفے‘ فیصلہ غان ملک اٹ سیاسی سوگوی بریک‘ ملک اٹ مردم شماری مننگ اٹی ءِ‘ پنجاب و کے پی ٹی مردم شماری آن مست گچین کاری امر مننگ کریکہ۔ اوپارے کہ گڑتیک ئسر کہ اسہ بندغ اسے نا مَر اکن اِرا صوبہ ٹی زور اٹ گچین کاری کرفنگ انگ ءِ‘ اسہ بندغ نا منشا اٹ آئین چلیفنگ مفک کہ او ہراتم خواہے آئین ءِ پرغے‘ ہراتم خواہس اسمبلی تے پرغے‘ ہراتم خواہس پولیس والا تے ٹھپی کے‘ ہراتم خواہے الیکشن کمیشن آ جلہو کے‘ عدالت آ جلہو کے؟ دا وڑ مننگ کپک۔ مریم اورنگزیب دا ہم پارے کہ ہراتم خواہس گچین کاری مرے امر خواہے ہمو وڑ فیصلہ برے دا وڑ مننگ کپک۔

(آن لائن)