ملک اٹ اسہ وخت آ گچین کاری آئینی تنکی ءِ چٹفک، حکومت

اسلام آباد: بنجائی وزیر کانود اعظم نذیر تارڑ پارینے کہ اسہ بندغ عمران خان نا مَر انا سوب آن اِرا صوبائی اسمبلی ءِ پرغنگا‘ ملک اٹ اسہ وخت آ گچین کاری آئینی‘ سیاسی و زرگرانی تنکی ءِ چٹفک‘ اِرا صوبہ ٹی اگہ جتا جتا گچین کاری کرفنگا تو دا آخبتی ءُ تنکی اس تینائی کیک۔ آئین پاکستان پاہک کہ 90دے اٹ گچین کاریک اسہ دے آ مریر۔ پنچ شنبے نا دے اسلام آباد اٹ پریس کانفرنس کرسا وزیرکانود پارے کہ اینو ہرا تنکی ٹی نن سلوک ان داٹی گچینی جہس ہم خننگ پننگ ءِ‘ ملک ءِ زرگزرنی سختی مون تروک ءِ ننے کفایت شعاری ناکنڈ آ ہنوئی تمک‘ اسہ بندغ اس ہرانا پن عمران خان ءِ اونا مَر انا سوب آن اِر صوبائی اسمبلی پرغنگا۔ دہشتگردی نا واقعہ غاتے ٹی ہڑدے ودکی مننگ اٹی ءِ‘ تدوک آ دور آ دہشت گرد تنظیم تے دوارہ آبادکننگا‘ ملک اٹ سیاسی تنکی ءِ‘ ارا صوبہ ٹی جتا جتا گچین کاری کرفنگا تو دا تنکی آخبتی دروشم تینائی کیک‘ ملک اٹ اسہ وخت آ گچین کاریک مریرہ‘ آئین پاکستان ہم پاہک کہ 90دے اٹ گچین کاریک اسہ وخت آ مریر‘ ملک اٹ سکیورٹی چیلنج و زرگرانی تنکی مون تروک ءِ‘ قومی وصوبائی اسمبلی نا اسیجا گچین کاری تیکن بیرہ اسہ ودکی ءُ بیلٹ پیپر اس درکار مریک‘ گڑا دا جوان ءُ ہیت اس اف کہ گچین کاریک اسہ وخت آ مریرہ؟ وزیر کانود پارے کہ پاک فوج دہشتگرد آتے سیم تیان پیش کشا‘ اسہ وخت اٹ گچین کاری تا مننگ آن سیاسی وزرگزرانی گچینی بریک۔1971 آن پد پاکستان ءِ سوگو کننگ کن آئین تننگا‘ ملک انا سیاسی سوگوی زرگزرانی سوگوی تون گنڈوک مریک‘ ہڑتوم آاسمبلی تا پرغنگ و دہشت گردی آن پد ملکی حالیت آک کل انا مون آٹو‘ الیکشن کمیشن ءِ ادارہ غاک سرجم تیان آگاہ کرینو‘ تینا ذات ءِ خوش کننگ کن فتوا تو خلیرہ گڑا تدوک آ سال اسمبلی ٹی اسہ پنہ اس چنڈسا اسمبلی ءِ پرغنگ آئین نا خلاف ورزی الو‘ اسہ چٹھی اس چنڈسا وزیراعظم اسمبلی ءِ پرغا‘ عمران خان قومی اسمبلی ءِ پرغسا آئین ءِ پرغا‘ مگہ نی آئین نا پاسداری ءِ کریس‘ نا سوشل بریگیڈ آئینی پرغنگ نا خبر تے تالان کننگ نا بناءِ کرے، آرٹیکل 6 انا نعرہ خلنگ آن مست تینا دامن ءِ ہُر‘ اوپارے کہ بنجائی اکائی تے ٹی آبادی نا کچ جتا جتا ءِ‘ 372 نا ایوان اٹ پنجاب نا کچ کل آن زیات ءِ‘ الیکشن کمیشن سکیورٹی صورتحال آتیا گچین کاری شیڈول ءِ پد بٹے‘ وزیرکانود پارے کہ 2017 آن پد سیاسی جماعت آتا مردم شماری آ گڑتیک ئسر تینٹ پی ٹی آئی ڈیجیٹل مردم شماری کرفنگ کن دستخط کرے ہرانا رد اٹ مچ آ ملک اٹ ڈیجیٹل مردم شماری کرفنگ نا فیصلہ کننگا‘ مچ آ ملک اٹ ڈیجیٹل مردم شماری مننگ اٹی ءِ دانا نتیجہ ہم 6 تُو اٹ بریک‘ ملک اٹ اسہ وخت آ گچین کاری کل ویل آتا ایسر ءِ۔

(آن لائن)