گراں ناز زندہ خننگا، خلنگوک نرینہ غاک اونا مارک ءُ

دکی : پولیس و لیویز جتاجتا علاقہ غاتے ٹی کارروائی کرسا خان محمد مری نا اُرائی گراں ناز ءِ مسڑ و مار تتون اوار پدی ایس‘ حوالی نا رد اٹ برمتہ مروک نیاڑی گراں ناز، اونامسڑ و مار تے کوہلو آن پدی ایسر۔ لیویز و پولیس حوالی نا رد اٹ پدی اتوک آتے کمشنر ژوب ڈویژن نا دوٹی تننگانے۔ دکی، کوہلو، بارکھان اٹ پولیس ناکنڈآن کارروائی کننگا‘ ہراکان گڈ پدی اتوک بندغ آتے کانودی کارروائی آن پد اوفتا خاہوت ءِ تننگک‘ کوہلو ٹی بنائی چھاپہ ٹی خان محمد نا اُرائی‘ مسڑ ومار ءِ پدی اتنگا وخت اس کہ اوکان گڈ ایلو برمتہ مروک چنا عبدالغفار، عبدالستار ہم خننگار۔ لیویز حوالی نا رد اٹ اسہ چناءِ دکی وخت اس کہ ایلو ارا چناءِ بارکھان ڈیرہ بگٹی سیمی علاقہ غان پک حوال آ چھاپہ خلسا پدی اتنگا۔برمتہ کار آک دزگیری آن بچنگ کن مزاحمت نا کوشست کتوس و آپریشن اٹ ہچ ءُ دزگیری اس ہم مننگ کتو۔ لیویز حوالی نا رد اٹ کل شش بندغ سرکاری رکھ اٹی ءُ‘ سرکاری کمامدار آتا رد اٹ گراں ناز و اونا چناتے میڈیا غا اتسا کل سرجم آتے تننگک۔ ایلو کنڈ آ آل پاکستان مری اتحاد نا تینا خواست آتیکن تروک دھرنا مسٹمیکو دے ہم برجا سلیس‘ خلنگوک آتا باوہ خان محمد مری پارے کہ کنا چناک خننگانو‘ ای سردار عبدالرحمن کھیتران نا برخلاف مقدمہ درج کرفوہ‘ بارکھان اٹ درج کروک ایف آئی آر ءِ منپرہ‘ خننگوک چنا وایلوفتے دھرنا ٹی پیش کننگے۔ مسٹمیکودے دھرنا نا شریدار آتتون یکجہتی کننگ کن جماعت اسلامی نا سینیٹر مشتاق احمد و صوبائی امیر مولانا عبدالحق ہاشمی تون اوار ایلو سیاسی جماعت آتا راہشونک ہم بسر۔دھرنا ٹی تولوک بندغ آتیکن سینیٹر میر سرفرار احمد بگٹی ناکنڈآن ارغ کننگا۔ہندن ہندا کیس انا رد اٹ کوئٹہ پولیس ناکنڈآن صوبائی وزیر سردار عبدالرحمن کھیتران ءِ جوڈیشل مجسٹریٹ 12 نا عدالت اٹ پیش کننگا و مجسٹریٹ 10 دے انا ریمانڈ آ پولیس نا دوٹی تس تے۔ سانحہ بارکھان نا زموار مننگ آ صوبائی وزیر سردار عبدالرحمن کھیتران ءِ کوئٹہ پولیس تدوک آدے دزگیر کریسس و پنچ شنبے نادے جوڈیشل مجسٹریٹ 12 ناعدالت اٹ سخت سکیورٹی ٹی ریمانڈ کن پیش کننگا۔ پولیس نا کنڈآن مجسٹریٹ آن 10 دے انا ریمانڈ نا خواست کننگاسس۔ جوڈیشل مجسٹریٹ صوبائی وزیر ءِ 10 دے انا ریمانڈ آ پولیس نا دوٹی تس۔

(آن لائن)