امن کن شہید مروک آ بہادر آک ننا ہیروک ءُ، بلوچستان حکومت

کوئٹہ: گورنر بلوچستان سید ظہور احمد آغا، وزیراعلیٰ جام کمال خان، اسپیکر بلوچستان اسمبلی میر عبدالقدوس بزنجو تون اوار صوبائی وزیرک، و اسمبلی نا باسک آک بلوچستان اٹی دہشتگردی نا مذمت ءِ کرسا پارینو کہ بلوچستان اٹی امن کن جام شہادت نوش کروک آ وطن نا بہادر آ مارک ننا ہیروک ءُ۔ نن قومی سیوت و سَنت اٹ دہشت گرد و تخریب کار آتا ناپاک انگا ارادہ غاتے بے سہب کننگ کینہ۔ کیپٹن کاشف و پاک فوج نا قربانی تے مدام یات تخنگک۔ دا ہیت آتے گورنر بلوچستان سید ظہور احمد آغا، وزیراعلیٰ جام کمال خان، اسپیکر بلوچستان اسمبلی میر عبدالقدوس بزنجو، ڈپٹی اسپیکر سردار بابر موسیٰ خیل، صوبائی وزیرک میر ضیاء اللہ لانگو، سردار عبدالرحمن کھیتران، میر سلیم احمد کھوسہ، میر ظہور احمد بلیدی، مبین خان خلجی، بشریٰ رند و ایلوفک تینا بیان تیٹی کریر۔ گورنر بلوچستان سید ظہور احمد سیکیورٹی فورس آتا گاڈی آ جلہو اٹی کیپٹن کاشف نا شہادت آ است ہسونی و ڈکھیائی نا درشانی کرسا پارے کہ ملک و صوبہ ٹی امن کن کانود نافذ کروک ادارہ غاتا قربانیک کچ آن زیات ءُ۔ نن قومی سیوت و سَنت اٹ دہشتگرد و تخریب کار آتا ناپاک ارادہ غاتے بے سہب کننگ کینہ۔ شہید کیپٹن نا مغفرت و آئی ای ڈی دھماکہ ٹی ٹھپی مروک سکیورٹی کارندہ غاتا زو دراخ جوڑی کن دعا کینہ۔ وزیراعلیٰ بلوچستان جام کمال خان سیکورٹی فورس آتا گاڈی آ آئی ای ڈی جلہو اٹی کیپٹن کاشف نا شہادت آ اتس ہسونی نا درشان کرے، و شہید نا خاہوت تون ہڑزخواہی کرے۔ او پارے کہ شہادت نوش کروک آ وطن نا بہادر آ مارک ننا ہیروک ءُ۔ مچ آ قوم دہشت گردی نا خلاف اسٹ ءِ۔ بلوچستان اٹی ان کن سیکورٹی فورس آتا قربانیک بے کسر ہنپسہ۔ اسپیکر بلوچستان اسمبلی میر عبدالقدوس بزنجو، ڈپٹی اسپیکر سردار بابر موسیٰ خیل آواران اٹی پاک فوج نا گاڈی آ جلہو نا مذمت ءِ کرسا پارے کہ کیپٹن کاشف و پاک فوج نا قربانی تے مدام یات تخنگک۔ دہشت گرد آک تینا پراگندہ غا ارادہ غاتیٹ قوم انا جیرت ءِ شیف شاغنگ کپسہ۔ او پارے کہ دہشتگرد آک تیان لغوری گام تے بس کیر، کیپٹن کاشف نا شہادت آ ارمانی اُٹ۔ دعا ءِ اللہ تعالیٰ شہید نا درجہ غاتے زیات کے۔ صوبائی وزیرک میر ضیاء اللہ لانگو، سردار عبدالرحمن کھیتران، میر سلیم احمد کھوسہ، میر ظہور احمد بلیدی، مبین خان خلجی، بشریٰ رند و ایلوفک سیکورٹی فورس آتا گاڈی آ دہشتگرد آتا جلہو نا ترند انگا لوز آتیٹی مذمت ءِ کرسا واقعہ ٹی کیپٹن ان شہادت آ ہڑزخواہی کرینو، اوفک پارینو کہ دہشت گردی نا برخلاف جنگ اٹی سکیورٹی فورس آک بے کچ قربانی تسنو۔ مچ آ قوم اوفتا قربانی تے سلام کیک۔ شرپسند آتا دا واقعہ غاتیان فورس آتا مورال شیف مفک۔ دشمن آک دا وڑ انا لغوری کاروائی تیٹ ننا حوصلہ غاتے شیف شاغنگ کپسہ۔ و شرپسند آک تینا پراگندہ ارادہ غاتیٹ سرسہب مفسہ۔ او پاریر کہ سیکورٹی فورس آک ملک و صوبہ ٹی امن ایمنی نا حالیت ءِ برجا تخنگ کن بے کچ قربانی تسنو۔ و فورس آتا قربانیک بے کسر ہنپسہ۔ او شہید و ٹھپی کارندہ غاتا خاہوت آتتون است ہسونی نا درشانی کرسا و شہید نا درجہ غاتا ودکی و پد سلوک آتے کن صبر انا دعا کریر۔

(آن لائن)