چیئرمین نیب تینا ویڈیو نا سوب آن بلیک میل مننگ ءِ، مسلم لیگ (ن)

لاہور: پاکستان مسلم لیگ(ن) پارینے کہ نیب بیرہ سویلین آتے خن نشان ایتک، چیئرمین نیب تینا ویڈیو نا سوب آن بلیک میل مننگ ءِ، چیئرمین نیب اٹ جیرت اس ارے تو عاصم سلیم باجوہ غان سوج کے کہ میرات آک ہراکان جوڑ مسنو؟ کھرب آ روپئی تا کرپشن نا دوبہ خلوک آک داسہ شہباز شریف آ 45 لکھ نا کرپشن نا دوبہ خلنگ ءُ، نیب نیازی اواری کھڈ مسنے، ہراتم حکومت بے سہبی نا وکٹ آ بولڈ مریک تو السی چکار ءِ اینک کننگ کن اپوزیشن آ دروغ نا کیس دائر کیک۔ وزیر مواصلات مراد سعید نا باوہ سٹوڈنٹ ویزا غا آسٹریلیا غا ہنا، او باوہ نا تیان وئی ءِ پاہے، و دا ہم پاننگے کہ او انت ڈگری اسے تون پدی بسنے؟ پیپلزپارٹی بے پتی نا تحریک خواہک تو اول چیئرمین سینیٹ نا برخلاف اتنگے، اگہ سرسہب مسن تو نن ہم پنجاب اٹ اتینہ۔ پاکستان پرائیویٹ کمپنی و عمران خان نا اے ٹی ایم مشین تا ہند اس جوڑ مسنے۔ ادارہ غاک قومی اسمبلی ٹی رپورٹ جمع کرفرہ، ولے حکومت دا رپورٹ آتیا تولک، کہ کرپشن مونی بف۔ آڈیٹر جنرل نا رپورٹ نا رد اٹ کورونا غا کمک اٹی ارب آ روپئی تا کرپشن مسنے، ولے مونی اتنگپسہ۔ دا ہیت آتا درشانی ءِ مسلم لیگ(ن) نا سیکرٹری جنرل احسن اقبال، حوالکاری سیکرٹری مریم اورنگزیب، ڈپٹی جنرل سیکرٹری عطا اللہ تارڑ اسک پارٹی نا بنجائی سیکرٹریٹ اٹی پریس کانفرنس کرسا کریر۔ احسن اقبال پارے کہ حکومت 2018ء آن پاکستان آ اقتصادی و زرگزرانی بھس کاری بیٹ کرینے، زرگزران آ چپی اٹ جلہو کننگا۔ ڈالر اٹ ودکی و روپئی نا قدر اٹ 10 درسد کمتی مسنے۔ اول ڈالر 154روپئی و اینو 166 روپئی آ بہا مننگ اٹی ءِ، روپئی نا قدر اٹی کمتی آن کبینی ودانے، اگہ ڈالر اسہ روپئی اس ودک تو ملک آ وام تا باریم 90ارب روپئی ودک، روپئی نا قدر کم مس تو پاکستان آ 117ارب روپئی نا ودکی باریم تما۔ احسن اقبال پارے کہ نارووال اٹی جوڑ کننگوک اسپورٹس سٹی نا کیس اٹی ہچ ءُ کرپشن اس پک متو، او ڈٹ اگہ پرو مسکہ تو جیولن تھرو ٹی ارشد ندیم میڈل دوئی کننگ اٹ سرسہب مسکہ۔

(آن لائن)