این سی او سی نا سکھ یاتری تے کن کرتار پور دربار ءِ ملنگ نا فیصلہ 

 اسلام آباد: نیشنل کمانڈ اینڈ آپریشن سینٹر (این سی و سی) سکھ یاتری تے کن کرتار پور دربار ءِ ملنگ نا فیصلہ  کرینے۔ دا رد اٹ بروک آک گرو نانک دیو جی نا بروک آ تُو مروک آ کزیہ دے نا وخت آ مذہبی دود آتیٹی بشخ ہلنگ کن گوردوارا دربار صاحب کرتار پور آ بننگ کیرہ۔ حوال آتا رد اٹ این سی او سی نا دیوان اٹی امنائی وڑ اٹ کووِڈ 19 نا سخت پروٹوکول آتا رد اٹ سکھ یاتری تے بروک آ تُو کرتارپور نا دورہ کننگ نا موکل تننگ نا فیصلہ کننگا۔ ڈیلٹا ویریئنٹ نا سوب آن انڈیا 22 مئی آن 12 اگست اسکان ’سی‘ کیٹیگری ٹی ئسکہ، و اوکان بروک آ بندغ و سکھ یاتری تے خصوصی وڑ اٹ موکل نا گرج مسکہ۔ ولے داسہ پورو ویکسینیٹڈ بندغ آتے سرٹیفکیٹ آتتون اوار پاکستان اٹی پترینگ انگ نا موکل مریک، داڑکن اوفتے 72 گھنٹہ غان کم وخت اٹی کرفوک پولیمرس چین ری ایکشن (آرٹی-پی سی آر) ٹیسٹ انا رپورٹ ءِ نشان تروئی تمک۔ داکان بیدس ایئرپورٹ آتیا ریپڈ اینٹی ایجن ٹیسٹ ہم کننگک، ہرانا نتیجہ مثبت بس تو ہمو بندغ ءِ پاکستان اٹی پترینگ نا موکل تننگپک۔ ایلو کنڈ آ این پی آئیز نا رد اٹ دربار اٹی اسہ وخت آ زیات آن زیات 300 بندغ ءِ پترینگ انگ نا موکل مریک۔  جانجوڑی وزارت نا عہدیدار نا رد اٹ پاکستان کورونا وائرس نا مون ءِ توننگ کن 3 کیٹیگری درستی راستی کرفیسس، کیٹیگری اے ٹی اوار ملک آتیان بروک آ بندغ آتے کن المی کووِڈ ٹیسٹ آن استثنیٰ دوئی ئسک، وخت اس کہ کیٹیگری بی نا ملک آتیان مسافر آتے 72 گھنٹہ ٹی کرفنگوک پی سی آر ٹیسٹ نا منفی نتیجہ نشان تروئی تمک، وخت اس کہ کیٹیگری سی آن مخلوق نا بننگ آ رکھ ئسکہ، و اوفک بیرہ این سی او سی نا خصوصی پارت نا رد اٹ بننگ کریرہ۔

(آن لائن)