چینی شاری تا رکھ اکن اسیجائی وڑ و ڈَول اس سجفنگ اٹی ءُ، شیخ رشید

راولپنڈی: وزیرداخلہ شیخ رشید پارینے کہ پاکستان و چین انا تین پہ تینی کمکاری و شونداری ءِ دہشت گردآتا دو تے ٹی لتاڑ مننگ کن الیپنہ‘ چینی شاری تا رکھ اکن اسیجائی وڑوڈول اس سجفنگ اٹی ان۔ یک شنبے نادے پاکستان اٹ تعینات چین انا سفیر نونگ رونگ وزیرداخلہ شیخ رشید نا ہنکین اٹ اوڑدہی کرے‘ شیخ رشید احمد چینی سفیر وایلو سفارتی کارندہ غاتیکن پیشیم نا مہمانی ہم کرے۔دا وخت آ وزیرداخلہ شیخ رشید پارے کہ چینی شاری و پاکستان اٹ کاریم کروک چینی کمپنی تا سکیورٹی ءِ پین گچین کینہ‘ چینی شاری تارکھ اکن اسیجائی وڑ ڈول اس سجفنگ اٹی ان‘ پاکستان و چین نا تین پہ تینی کمکاری وشونداری ءِ دہشت گردآتا دوتے ٹی لتاڑ مننگ کن الیپنہ۔ وزیرداخلہ پارے کہ اوغانستان اٹ بدل مروک حالیت آتا سوب آن ننا ڈیہہ و زیات اہمیت دوئی کرینے‘ اوغانستان اٹ سوگوا من ڈیہہ انا شونداری و دنیا ناسلامتی کن اہم ءِ‘ پاکستان اوغان امن و ہموڑے سوگو حکومت کن تینا کڑد ءِ ادا کرسا کیک‘ وزارت داخلہ اوغانستان غان پیشن مروک آتتون ہم کمک کننگ اٹی ءِ۔ دا وخت آ چینی سفیر پارے کہ پاکستان اٹ چینی کمپنیک چندی ڈٹ آتیا کاریم کننگ اٹی ءُ‘ چینی شاری و کمپنی تیکن سکیورٹی پروٹوکول ءِ پین سخت کننگے۔

(آن لائن)