طالبان تا کنڈ آن اشرف غنی و امر اللہ صالح ءِ ہم بشخنگ نا پڑو

اسلام آباد: اوغان طالبان تا بنجائی راہشون خلیل الرحمان حقانی پارینے کہ داسہ کس اتون دشمنی اف، طالبان تا کنڈ آن اشرف غنی و امر اللہ صالح ءِ ہم بشخنگ اُن۔ پاکستانی نجی ٹی وی جیو نیوز تون ہیت و گپ اٹی طالبان راہشون خلیل الرحمان حقانی نا پاننگ ئس کہ امریکہ تون دشمنی نا وخت آ ہم اولیکو گام ننا کنڈ آن ہرفنگتویسس، و داسہ ہم نن دُن کپنہ۔ امریکہ ننا مذہب و ملک اتون بیدادی کرے تو بیوس مرسا توفک ہرفین۔ خلیل الرحمان حقانی پارے کہ ننا دشمنی نا سوب نظام نا بدلی ئسکہ، و داسہ نظام بدل مسنے۔ داسہ اشرف غنی، امراللہ صالح و حمد اللہ محب کل ءِ بشخنگ نا پڑو کرینن۔ اشرف غنی، جرنیل و مسکوہی حکومتی عہدیدار آتتون اوار ہرکس کہ اوغانستان آ بننگ خواہے بننگ کیک۔ کس آن ہم بیر ہلنگپک، تاجک، بلوچ، ہزارہ، پشتون و نن کل ایلم اُن۔ انٹرویو ٹی خلیل الرحمان حقانی نا پاننگ ئس کہ اوغانستان نا اسہ منظم ءُ نظام جوڑ مریک، ہراٹی کل قوم، کل تنظیم و خوانندہ غاک اوار مریرہ۔ قوم ءِ سیوت نا کنڈ آ دروک آتے حکومت اٹ بشخ تننگک۔ طالبان راہشون اوغانستان ءِ اِلوک ہنوک آتے کن کلہو تس کہ پیشن ہنپبو، ہنداڑے مبو و تینا ملک انا خذمت ءِ کبو۔ دشمن نمے خلیفک کہ امارات اسلامی نمے سزا ایتک، اسلام امن نا دین ءِ، داڑے کل ءِ بریبر حق رسینگک و کس اتون بے انصافی مفک۔ خلیل الرحمان حقانی نا پاننگ ئس کہ کل ملک و مسلمان ملک آتے کن کلہو دادے کہ تینا مخلوق ءِ حق ایتر، اسُل کہ اوفتا تعلقداری ہرا مذہب آن کہ مرے، ہرا بندغ آتا انت کہ حق اس مریک، اوفتے تننگے۔ ایلو کنڈآ اوغانستان نا صوبہ پنجشیر اٹی جنگ انا گمان ٹلانے، و مسکوہی جہادی کمانڈر احمد شاہ مسعود نا مار احمد مسعود طالبان تا مخ تفی نا پڑو کرینے، طالبان تا کنڈ آن دارالحکومت کابل آ کنٹرول آن پد اوغانستان نا مسکوہی نائب صدر امراللہ صالح تون اوار کیہی مخالف آک پنجشیر دامان ءِ سر مسوسر۔ داسہ ناقابل تسخیر تکنگوک صوبہ پنجشیر اٹی طالبان تا برخلاف مزاحمت نا گمان ئسکہ، مسکوہی جہادی کمانڈر احمد شاہ مسعود نا مار احمد شاہ ہم جنگ انا تیاری تا بناءِ کریسس، و امریکہ غان کمک ہم خواہسوسس۔ ولے داسہ پوسکن آ حوال آتا رد اٹ احمد مسعود و طالبان تا نیام اٹ مذاکرات سرسہب مسنے، و او طالبان تا مخ تفی نا پڑو ءِ کرینے، اسہ ویڈیو اس سوشل میڈیا غا مونی بسنو، ہراٹی امریکہ ءِ درکار حقانی گروپ نا اہم انگا کمانڈر و جلال الدین حقانی نا ایلم خلیل الرحمان حقانی کابل اٹی اسہ دیوان اسے نا وخت آ جک مرسا پڑو کیک کہ احمد مسعود فون آ طالبان تا مخ تفی نا پڑو ءِ کرینے، ایلو کنڈ آ داکان مست احمد مسعود نا پاننگ ئس کہ طالبان تتون جنگ انا ہچ ءُ ارادہ اس اف، اونا پاننگ ئس کہ بیرہ مسکوہی نائب صدر امراللہ صالح جنگ خواہسکہ، اودے پاننگانے کہ اُراٹی مس، یا پین تین ہن۔