پنی آ شاعر ادیب شاکر ندیم

بہاول نسیم بنگلزئی

0

Get real time updates directly on you device, subscribe now.

 

پنی آ شاعر ادیب شاکر ندیم نا اصل پن عبدالقدوس ءِ۔ اونا باوہ نا پن فقیر محمد، قبیلہ سمالانی، تخلص شاکر ندیم، ساکن کلی کمالو تحصیل ضلع کوئٹہ۔

خواجہ شاکر ندیم جنوری 1971ء اٹی کلی کمالو سریاب کوئٹہ ٹی ودی مس۔ او تینا دینی تعلیم قرآن پاک ءِ خواننگ آن بیدس ایف اے کرینے۔ او دا وخت آ تینا دو انا پوریا کرسا تینا زند ءِ گچین وڑ اٹ تیر کننگ ءِ۔ شاکر ندیم ءِ چنک سنی آن تینا لمئی بولی براہوئی نا شونداری آن بیدس راج انا راہشونی نا گڑتی ہم ئسکہ۔ اودے زمانہ طالب علمی آن شاعری و قلم تون زیات مہر ئسکہ۔ ہندا سوب آن شاکر ندیم تینا پن اتون شاکر ندیم نا تخلص ءِ گچین کرسا براہوئی نا پنی آ شاعر ادیب قلم کار و استاد شاعر صابر ندیم نا شاگڑدی ٹی 1991ء آن شاعری نا بناءِ کرے۔ او شاعری نا بحر و وزن لوز آتا گچینی و تینا گچین آ خیال اٹ ہنین ءُ شاعری کرسا براہوئی ادب نا پڑ آ اسہ جوان ءُ پن اس ہم کٹانے۔

شاکر ندیم تینا شاعری و قلم نا کمک اٹ براہوئی زبان و ادب ءِ گیشتر شونداری رسیفنگ کن ہم جوان ءُ خذمت سر تننگ ءِ۔ اونا ادبی خذمت آک سفت کڑزرہ۔ اونا شاعری نا اِرا کتاب ”خڑینک آک کیرہ بشخندہ“، ”ڈغار آ آسمانی گل“ آن بیدس پین چندی کتاب آک زیر تبع ءُ۔

شاکر ندیم نا شاعری ٹی بحر و وزن، گچین آ لوز آتا کاریم اٹ اتنگ، خیال و فکر انا گیسو ٹی راجی شرحالی نا کلہو، دین دوستی و رواداری نا ہم گچین و بے مٹ سبخ دو بریک۔ ہندا سوب آن ہر شاعر ادیب و ادب دوست خواجہ، شاکر ندیم نا ہنین آ شاعری و پر فکر آ خیال انا سفت ءِ کیک۔

داکان بیدس شاکر ندیم اسہ استاد شاعر اسے نا حیثیت ءِ تخک، اونا چندی شاگڑد آک ہم اریر کہ اوفتیٹی ہدایت فدا، واحد راز، ابراہیم ہنین، ہندن پین چندیک اوار اریر، کہ اوفک د اوخت آ براہوئی ادب ناپڑ آ گچین ءُ ادبی کڑد ادا کننگ ءُ۔

شاکر ندیم نا پاننگ ءِ کہ کنا نظر اٹی زبان و ادب کن خذمت کروک آ کل شاعر ادیب و دانشور آک شرف کڑزرہ۔ ای سائر عزیز، شہزاد غنی، حیدر حسرت، و اردو نا شاعر آتیٹی ساگر صدیقی، سائر لدھیانوی نا شاعری و ادبی کڑد آن زیات متاثر ہم اریٹ۔

شاکر ندیم پنی آ ادبی ادارہ سخاوت ادبی کاروان نا چیئرمین نا حیثیت اٹ ادب نا پڑ آ بے مٹ ءُ کڑد اس ادا کننگ ءِ۔ سخاوت ادبی کاروان ہمو گچین آ ادبی ادارہ ءِ کہ او بلوچستان اٹی براہوئی زبان و ادب نا شونداری، ورنا شاعر ادیب خواجہ غاتا است بڈی و اوفتا لائخی تا مونی اتنگ نا جہد ءِ مستی دننگ اٹی گچین ءُ کڑد اس ادا کننگ ءِ۔ دا ادارہ نا ادبی خذمت آک سفت کڑزرہ۔ شاکر ندیم نا شخصیت اٹی درویشانہ وصف، ایلم دوستی، مہر، رواداری، ادب تون زیات شوق تخنگ، دین دوستی و راج انا راہشونی نا ہم گچین ءُ جوزہ اس خننگک۔ او علاقہ غان پیشن بلوچستان نا ایلو جاگہ غاتیٹی ہم اڈ تروک آ ادبی کچاری تیٹی ساڑی مرسا زبان و ادب نا شونداری آن بیدس راج انا راہشونی و ادب نا تالانی نا گرج آتے پورو کننگ اٹی جوان ءُ کڑد اس ادا کرسا کیک۔

شاکر ندیم، براہوئی نا شاعر ادیب آتیٹی ہمو ادیب آتیان ءِ کہ اونا است اٹی براہوئی ادب نا شونداری نا دڑد و شاعر ادیب آتا راج اٹی اسہ گچین ءُ ہند و شرف اس دوئی مننگ نا گڑتی ہم ارے۔ او سدائی زبان و ادب نا تالانی و ورنا شاعر ادیب آتا است بڈی، شاعر ادیب آتتون مہر و ہمدردی نا کلہو آتا تالانی نا فکر و گڑتی ءِ ہم برجا تخانے۔

شاکر ندیم نا شاعری و قلم اٹ ہرا وڑ اٹ کہ براہوئی زبان و ادب ءِ درستی راستی و شونداری دو بسنے اونا دا ادبی خذمت آک ستا کڑزرہ۔ دعا ءِ کہ خدا تعالیٰ اونا قلم اٹی برکت شاغے، او سدائی ہند اوڑ اٹ براہوئی زبان و ادب کن خذمت کرسا کے۔(آمین)

ہفتئی تلار

تاک: 19

28-22 فروری 2021ء

پنہ: 5

Get real time updates directly on you device, subscribe now.

Leave A Reply

Your email address will not be published.