پولیس و عدالت آ جلہو، بنجائی کابینہ جے آئی ٹی نا منظوری ءِ تس
اسلام آباد: بنجائی کابینہ پولیس و عدالت آ سلہہ بند ٹولی تا جلہو تا جاست پاست کننگ کن ہائی پاورڈ جے آئی ٹی جوڑ کننگ نا منظوری ءِ تس۔ بنجائی کابینہ سرکولیشن نا کمک اٹ جے آئی ٹی نا منظوری ءِ تس۔ مسکوہی وزیراعظم عمران خان 28 فروری آ سہ ٹولی اسے تون اوار جوڈیشنل کمپلیکس اسلام آباد بنکنگ کورٹ اٹ حاضر مسوسس و ہموڑے لٹ وکٹ و گڑاتے پرغاسس، جوڈیشنل کمپلیکس اٹ خلوک کیمرہ غات کمک اٹ گڑاتے پرغوک آتا برخلاف مقدمہ جوڑ کننگاسس‘ اوکان گڈ عمران خان لاہور ہائی کورٹ پیشی نا وخت آ ہم اسہ ٹولی اسے تون اور ہناسس‘ عدالت نا دنگ اٹ نعرہ خلنگا۔ 18 مارچ آ عمران خان نا جوڈیشنل کمپلیکس پیشی نا وخت آ اسلام آباد پولیس آ خل کاری کننگا ہرانا سوب آن پولیس کارندہ غاک ٹھپی مسر‘ تحریک انصاف نا داعمل آن ادارہ غاک بھاز خار اٹی ءُ‘ ہندا سوب آن کمیٹی جوڑ کننگ نافیصلہ کننگا‘ جے آئی ٹی نابابت تدوک آدے حکومت اٹ اوار جماعت آتا دیوان نافیصلہ نا رد اٹ کننگا، ہائی پاورڈ جے آئی ٹی جوڑ کننگ نا سمری وزارت داخلہ تون ئس تدوک آ دے بنجائی کابینہ نا دیوان اٹ جے آئی ٹی جوڑ کننگ نا منظوری تننگا‘ جے آئی ٹی ٹی کل ادارہ غاتا افسر آتے اوار کننگانے۔
(آن لائن)