آڈیو لیکس نا کِسہ دروغ مس تو ننے سزا تننگے، وزیر داخلہ

اسلام آباد : وزیرداخلہ رانا ثناء اللہ پارینے کہ حالیت آک ہندن ءُ کہ اگہ تدبر و دانائی اٹ فیصلہ متو تو پھساد‘ بے چیٹی وتاڑ واڑ تالان مریک۔ آڈیو لیکس نا کسہ دروغ مس تو ننے سزا تننگے‘تینا ٹویٹ اٹ او پارے کہ گچین کاری تا بابت چندی سلاک اریر‘ پارلیمنٹ ءِ راہشونی کننگ نا واکداری ارے‘ حکومت و ادارہ غاتا راہشونی ءِ کے‘ نن آئین نا رد اٹ باندات آتے مونی دننگ خوانہ‘اوپارے کہ کورٹ اناپرمان آ الیکشن کمیشن شیڈول تس‘ نن دا پرمان نا رد اٹ گچین کاری عمل نابناءِ کرین‘ سپریم کورٹ ناپرمان آن چپ ہننگ نا سجفنگ ہم کتونہ۔ اوپارے کہ ہرا آڈیو لیک مس‘ گڑا علی ساہی نا وجود ارے‘ اِرا مار انا ذکر ہم ارے‘دا باندات آتا ہم جاست پاست کننگے‘ اگہ دا کسہ دروغ مس تو ننے سزا تننگے‘ اوپارے کہ صوبائی گچین کاری تیان پد اقتدار اٹ مروک حکومت نا ساڑی گری ٹی قومی اسمبلی نا گچین کاری تے ٹی لیول پلیئنگ فیلڈ مفک‘ ساف شفاف گچین کاری اڈ تننگ آ سوج چست کننگک‘ او مستی پارے کہ نگراں حکومت آتا ساڑی گری ٹی اسہ وخت آ کل اسمبلی تا گچین کاریک شفاف و انصاف اٹ مریرہ تو دا ملک اکن جوان مریک۔

(آن لائن)