بارکھان واقعہ،بے کنڈہلوک انکوائری کننگک، ضیاء لانگو

کوئٹہ: بلوچستان اسمبلی ٹی حکومت باور کرفینے کہ بارکھان اٹی مسہ بندغ نا خون نا بے کنڈ ہلوک جاست وپاست ءِ کننگک دا اوار زموار آتے اوفتے اوفتا کروک نا سخت سزا تننگک۔ چار شنبے نادے آ بلوچستان اسمبلی نا دیوان ڈپٹی اسپیکر سردار بابر خان موسیٰ خیل نا کماشی ٹی مس ہراٹی اسمبلی نا باسک آک بارکھان اٹی اسہ زالبول اسے تون اوار مسہ بندغ نا خون نا مذمت ءِ کرسا اوار خونی تا دزگیری نا خواست کریر۔ وزیرداخلہ بلوچستان میر ضیاء لانگو ایوان ءِ پارے کہ وزیراعلیٰ بلوچستان میر عبدالقدوس بزنجو واقعہ نا دمدستی نوٹس ءِ ہلسا بڑزکو کہولی جاست وپاست کن جے آئی ٹی اس ٹہیفنگ نا پرمان جاری کرینے، داواقعہ ٹی ہرکس کہ اوار مس اودے معاف کننگپک و دبہ دار آتے سخت سزا تننگک۔ بلوچستان اسمبلی نا دیوان اٹی پبلک سروس کمیشن بلوچستان نا سالانہ رپورٹ سال 2020ء ءِ پیش کننگا۔ دیوان اٹی بلوچستان اسمبلی سینیٹ آف پاکستان نا گولڈن جوبلی نا رداٹ خصوصی رسمی دیوان ءِ ایوان اٹ اڈترفنگ نا تحریک ءِ ہم منظور کرے، تحریک ءِ پارلیمانی سیکرٹری خلیل جارج پیش کرے صوبائی وزیر نصیب اللہ مری، میر اسد بلوچ و ایلو باسک آک بارکھان واقعہ ٹی 3 بندغ آتا خون نا ترندانگا لوز آتیٹی مذمت ءِ کریر و اودے مذہب و روایت آتیان چپ گوندسا زہمی خاہوت تون ہمدردی نا درشانی ءِ کریر و ایماندار تا درجہ غاتا بڑزی کن دعا کریر۔ اوکان پد اسمبلی دیوان ءِ 23 فروری اسکان پدبٹنگا۔

(اے پی پی)