بنجائی وزیر،سلاہکار،کمکار تا تنخواہ ہلپننگ نا فیصلہ

اسلام آباد : وزیراعظم شہبازشریف پریس کانفرنس کرسا ملک اٹ کفایت شعاری مہم نابابت بھلو بھلو پڑو کرینے۔ او پارے کہ بنجائی وزیر،سلاہکار،کمکار آک تنخواہ ہلپننگ نا فیصلہ کرینو۔ یوٹیلٹی بل آتے ہم تینا جیب آن تننگک، وزیر تا کل لگژری گاڈی تے پدی ہلسا نیلام کننگک، توشہ خانہ نا ریکارڈ ءِ پبلک کننگک، ہچ ءُ انتظامی یونٹ اس جوڑ مفک،بنجائی کابینہ نا دیوان اٹ فیصلہ کننگانے۔ ملک اٹی کفایت شعاری مہم نا بابت گام گیج آتے پک کننگک، عسکری ادارہ غاک غیرجنگی خڑچ آتا بابت مثبت ورندی تسنو، منہ دے ٹی آئی ایم ایف تون معاہدہ پک کننگک، اسلام آباد اٹ وزیراعظم شہباز شریف وایلو وزیر تتون اوار پریس کانفرنس کرے و پارے کہ اومیت کننگک کہ بروک آ منہ دے اٹ آئی ایم ایف تون معاہدہ پک کننگک۔ او پارے کہ معاہدہ نا سوب آن کبینی پین ودک‘ پاکستان اٹ غریب آک مدام قربانی تسنو‘ زلمی جمب مرے یا نوکاپ قدرتی آفت آتے ٹی مدام غریب الس خوارمسنے‘ پورو کوشست کننگ اٹی ان کہ پاکستان ءِ مشکل آتیان کشن‘پاکستان ءِ غریبی آن نجات ترفوئی ءِ تو اسیجا کوشست کروئی مریک‘اوپارے کہ آئی ایم ایف معاہدہ نا سوب آن لس بندغ آ باریم تما تو سوج چست کننگک کہ حکومت انت کرینے؟ اشرافیہ نا چنا ناجوڑ مرے تو او فرانس اٹ درمان کرفنگ کیک‘ غریب نا اُراٹی ناجوڑی اس مرے تو مچ آ خاہوت نا تغ حرام مریک کہ درمان امر مریک۔ بینظیرانکم سپورٹ پروگرام اٹ 25درسَد ودکی کننگ اٹی ان۔ وزیراعظم پڑو کرے کہ کل بنجائی وزیر‘ سلاہکار و وزیرمملکت آک رضاکارانہ وڑ اٹ تنخواہ و آسراتی ہلپسہ‘ خصوصی کمکار آک ہم رضاکارانہ وڑ اٹ تنخواہ و آسراتی ہلپننگ نافیصلہ کرینو‘ اوپارے کہ وزیرک گیس، دیر‘ بجلی نا بل آتے ہم تینا جند انا جیب آن ایترہ‘داڑتون اوار وزیرتیان لگژری گاڈی تے پدی ہلنگ نافیصلہ کننگانے‘ کل لگژری گاڈی تے پدی ہلنگ انگ ءِ اوفتے نیلام کننگک ہراڑے گرج مس وزیر تے سکیورٹی نا اسہ گاڈی اس تننگک‘ وزیر تا کمکار کارندہ غاک درملکی دورہ غاتیان اوفتتون ہمپسہ وزیرک درملکی دورہ غاتے ٹی فائیو اسٹار ہوٹل تے ٹی رہینگپسہ‘ افسر آک تینا بجٹ اٹ المی بدلی کیرہ‘اومستی پارے کہ وزیر تا جون 2024 اسکان لگژری گاڈی ہلنگ آ رکھ خلنگنے‘ کابینہ نا اسہ باسک یا سرکاری افسر اس ہم لگژری گاڈی کاریم اٹ اتپک‘ہمو سینئر افسر آتیان ہم سرکاری گاڈی تے پدی ہلنگک‘ ہرافتے گاڈی تا الائنس رسینگک۔ شہباز شریف پارے کہ وزیر وسرکاری افسر آک بزنس کلاس اٹ سفر کپسہ‘ وزیرک ملک و پیشن ملک اکانومی کلاس اٹ سفر کیرہ۔ زوم کانفرنس نا وڑ کینہ تاکہ سفر نا خڑچ آتے کم کننگ مرے‘ اوپارے کہ بروک آ اِرا سال اسکان ہچ ءُ انتظامی یونٹ اس جوڑ کننگپک۔ بنجائی حکومت اٹ پوسکن ءُ بشخ جوڑ کننگپک‘ سنگل ٹریژری اکاؤنٹ جوڑ کننگک‘ سرکاری ملازم آتے اسٹ آن زیات پلاٹ الاٹ کننگپک‘ شار انا نیام اٹ ساڑی سرکاری اُرا تے بہا کننگک‘ وزیر و سرکاری افسر آتیکن ٹاؤن ہاؤس جوڑ کننگک۔

(مانیٹرنگ ڈیسک)