اسلام آباد نا خلقی آ علاقہ غاتے آسراتی فراوان کننگے، وزیر اعظم

اسلام آباد: وزیراعظم محمد شہباز شریف پارت کرینے کہ اسلام آباد نا خلقی آ علاقہ غاتا ہنکینی تے گچین آسراتی فراوان کننگے، اسلام آباد اٹی برجا شونداری کاریم تیا 24 گھنٹہ کاریم ءِ پک کننگے، ہرڈٹ انا تھرڈ پارٹی ویلیڈیشن ءِ پک کننگے، اسلام آباد اٹی سالڈویسٹ مینجمنٹ نا مربوط نظام نا درستی راستی نا بابت سی ڈی اے رپورٹ پیش کے، اسلام آباد اٹی پارکنگ نا ویل آتے دمدستی وڑاٹ ایسر کننگے۔ وزیراعظم آفس نا میڈیا ونگ آن جاری بیان نارداٹ وزیراعظم محمد شہباز شریف نا کماشی ٹی اسلام آباد اٹی برجا شونداری ڈٹ آتیا چارشنبے نادے آ جاچ دیوان اس اڈہلک۔ دیوان اٹی وزیرا عظم اسلام آباد نا خلقی آ علاقہ غاتا شونداری و انفراسٹرکچر نا بابت ہم سرجم آتے بٹنگا۔ وزیراعظم نا سمندر پار پاکستانی تیکن سی ڈی اے نا ڈٹ آتے ترند رفتار اٹ پورو کننگ نا پارت کرسا پارے کہ سمندر پار پاکستانی تیکن برجا ڈٹ آتے جہانی آب آ تفنگے، سمندر پار پاکستانی تیکن ڈٹ آتے شفاف و وڑوڈول ءِ آن لائن کننگے، سمندر پار پاکستانی تے پاکستان اٹی زرکاری کن ہروڑنا آسراتی فراوان کننگے۔ وزیراعظم اسلام آباد اٹی شونداری ڈٹ آتیا کاریم نا رفتار ءِ ترند کننگ و السی ڈٹ آتے اولیتی بنداو تیا پورو کننگ کن جاچ کمیٹی اس جوڑ کرے۔ وزیراعظم ءِ پاننگاکہ اسلام آباد نا خلقی آ علاقہ غاتا شونداری کن سی ڈی اے 10 ارب روپئی نا زر جتا کرینے ہراڑان سالڈویسٹ مینجمنٹ، سیوریج نا نظام و سڑک آتا تفنگ و بحالی و پبلک ٹرانسپورٹ نا اسکیم تے پورو کننگک۔ دیوان ءِ بارہ کہو بائی پاس، سیونتھ ایونیو انٹرچینج، مارگلہ ایونیو، 11 ایونیو، آئی جے پی روڈ، اسلام آباد ایکسپریس وے و پارکنگ پلازہ نا برجا ڈٹ آتا بابت سرجمی اٹ معلومدار کننگا۔ دیوان ءِ پاننگاکہ بارہ کہو بائی پاس آ 24 گھنٹہ کاریم برجاءِ۔ وزیراعظم بارہ کہو بائی پاس ءِ زوت آن زوت پورو کننگ نا پارت کرے۔ وزیراعظم پارے کہ بارہ کہو بائی پاس السی وڑنا اہم ءُ ڈٹ اسے ہرانا تفنگ اٹ سلنگ ءِ قبول کننگپک۔ دیوان ءِ پاننگاکہ سیونتھ ایونیو انٹرچینج و مارگلہ ایونیو ڈٹ پورو مسنو۔ آئی جی پی روڈ انا ودکی ڈٹ 23 مارچ اسکان پورو کننگک۔ الیونتھ ایونیو و اسلام آباد ایکسپریس وے انا فیزون رواں سال انا نیمہ وخت اس کہ بلیو ایریا پارکنگ پلازہ و ایکسپریس وے انا فیز ٹو رواں سال انا ایسر اسکان پورو کننگک۔ دیوان اٹی چیئرمین سی ڈی اے نا کنڈان ٹرانسپورٹ نا فیڈرروٹس و بس ٹرمینل نا بابت ہم حوال تننگا۔ دیوان ءِ پاننگاکہ سی ڈی اے نا کنڈان جہانی آب انا اسہ نیشنل بس ٹرمینل و 3 سٹیلائٹ ٹرمینل جوڑ کننگک ہراٹی نجی بشخ انا زرکاری مریک۔ داکان بیدس 90 دے اٹی بس آتا 13 فیڈر روٹ آتا بناءِ کننگ انگ ءِ وخت اس کہ چار روٹ داوخت آ کاریم کننگ اٹی ءُ۔ اسلام آباد نا پبلک ٹرانسپورٹ سسٹم نا کمک اٹ ہڑدے ئی بنداو آ 2 لکھ نا خڑک مخلوق آب اٹ سفری آسراتی تیان فائدہ ہرفنگ ءُ۔ وزیراعظم ءِ اسلام آباد اٹی پارکنگ نا ویل آتا ایسری کن سی ڈی اے نا گام گیج آتیان معلومدار کننگا۔ داکان بیدس سی ڈی اے ایف ایٹ، ایف ٹین، جی نائن، آئی ایٹ و بلیو ایریا ٹی پارکنگ پلازہ جوڑ کننگ ء۔ 5000 گاڈی تا پارکنگ نا کچ آن دا پارکنگ پلازہ شار اٹی پارکنگ نا ویل آتے ایسر کننگ اٹ اہم ءُ کڑد اس ادا کیک۔ چیئرمین سی ڈی اے سمندر پار پاکستانی تیکن ہنکینی ڈٹ آتیا ہم سرجم حوال تس۔ وزیراعظم پارت کرے کہ دا ڈٹ آتے جہانی آب آ اتنگ کن اوفتے ٹی گچین آسراتی میسر کننگے۔ وزیراعظم پارے کہ سمندر پار پاکستانیک ننا نہادی میرات ءُ، دا ڈٹ آتیٹی زرکاری کن نظام ءِ شفاف و خودکار جوڑ کننگے۔ ڈٹ آتا کسر اٹ ہروڑنا اڑاند و تعطل ءِ امنا کننگپک۔ دیوان اٹی بنجائی وزیر اسحاق ڈار، رانا ثناء اللہ، سلاہکار وزیراعظم احد چیمہ، خصوصی کمکار طارق باجوہ، مسکوہی بنجائی وزیر طارق فضل چوہدری، مسکوہی اسمبلی نا باسک حنیف عباسی، انجم عقیل و تعلقدار بڑزکو کمامدارآک بشخ ہلکر۔

(اے پی پی)