سانحہ بارکھان، ارٹمیکو دے ہم دھرنا برجا، وکیل آتا ہڑتال
بلوچستان نا کل سیاسی و قبائلی راہشون تا دھرنا نا شریدار آتتون یکجہتی، وزیر اعظم نا بننگ اسکان بش مفننگ نا پڑو
Get real time updates directly on you device, subscribe now.
کوئٹہ : آل پاکستان مری اتحاد نا کنڈآن سانحہ بارکھان اٹ کسفوک لمہ و اِرا مار انا خون نا زموار بندغ نا برخلاف مقدمہ درج کرفنگ و انصاف کن کوئٹہ نا علاقہ ریڈ زون اٹ فیاض سنبھل شہید چوک آ دھرنا ارٹمیکو دے ہم برجا سلیس‘ دھرنا نا شریدار آتیان قبائلی، سیاسی راہشون بلوچستان عوامی پارٹی نا سینیٹر پرنس محمد عمر احمدزئی، بنگلزئی قبیلہ نا سروک سردار نور احمد بنگلزئی، جمعیت علماء اسلام نا راہشون بلوچستان اسمبلی ٹی پارلیمانی لیڈر ملک سکندر ایڈووکیٹ، میر زابد ریکی، نیشنل پارٹی بلوچستان نا صدر رحمت صالح بلوچ، بلوچستان نیشنل پارٹی نا صوبائی اسمبلی نا باسک ملک نصیر احمد شاہوانی، احمد نواز بلوچ، شکیلہ نوید دہوار، جمعیت علماء اسلام (نظریاتی) نا قاری مہراللہ، بلوچستان بار کونسل نا قاری رحمت اللہ وایلو وکیل تنظیم تا وکیل‘ قبائلی متبر‘ سیاسی راہشون و ہر تپہ غان تعلقدار بندغ آتا بھلو کچ اس یکجہتی نا درشانی کرسا اوفتے ہر وڑ انا کمک ناباور کرفسا ڈکھ و است ہسونی نا درشانی کریر۔ ایلو کنڈ آ کوئٹہ بار ایسوسی ایشن ناکنڈآن بارکھان آ لمہ مار تا رسینگوک لاش و اوفتا خون نابرخلاف کوئٹہ تون اوار مچ آ بلوچستان اٹ عدالت آتیان بائیکاٹ کننگا و اسہ وکیل اس ہم عدالت آتے ٹی پیش متو۔ تدوک آ دے بارکھان نا علاقہ غان کُو آن رسینگوک لاش و اوفتا خون نابرخلاف وکیل برادری ناکنڈآن عدالت آتیان بائیکاٹ نا پڑو کننگاسس‘ وکیل تنظیم آک چار شنبے نادے کوئٹہ نا عدالت عالیہ تون اوار شیفکو عدالت آتیان بائیکاٹ کریر ومچ آ صوبہ ٹی اسہ عدالت اسے ٹی ہم وکیل آک پیش متوس۔ سانحہ بارکھان آ خان محمد مری نا اُرائی و 2 مار انا خون آ ارمان کرسا عدالت آتیان بائیکاٹ نا پڑو کننگاسس و دوبہ دار آتے دزگیر کپننگ ءِ پولیس نا بے سہبی گوندسا سانحہ نا بے کنڈہلوک جاست پاست نا خواست کننگا و با اثر بندغ نا نجی جیل اٹ بندی تے یلہ کننگ نا خواست کریر۔
(آن لائن)