2023پولیو نا چٹفنگ کن اہم ءُ سال اسے، قادر پٹیل

اسلام آباد: بنجائی وزیر جان جوڑی عبدالقادر پٹیل پارینے کہ 2023 پولیو نا چٹفنگ کن اسہ اہم ءُ سال اسے، 39 ضلع غاتیٹی 60 لکھ آن زیات چناتے پولیو تور پڑی کنفنگا۔ چارشنبے نادے آ وزارت جان جوڑی آن جاری بیان نا رداٹ بنجائی وزیر پارے کہ ملک انا چندی بشخ آتیٹی پنچ سال آن کم وئی نا 60 لکھ آن زیات چناتے پولیو دین آن بچفنگ نا مہم ایسر مس۔ اوپارے کہ لاہور، فیصل آباد و سویلی خیبرپختونخوا نا ہفت ضلع بنوں، ڈی آئی خان، ٹانک، قطبی وزیرستان، بڑزکو سویلی وزیرستان، زیریں سویلی وزیرستان و لکی مروت اٹی مہم جم وڑاٹ مس، وخت اس کہ اوغانستان تون کیبی 30 ایلو ضلع غاتا مخصوص یونین کونسل بشمول اوغان پناہ گزین کیمپ و ہمو علاقہ غاتے ٹی ہراڑے آبادی نا گیشتری اٹ ہمپ و بٹ مریک، ہموڑے درکار ویکسی نیشن نا ہدف ءِ دوئی کننگانے۔ بنجائی وزیر پارے کہ جنوری نا قومی کہول انا ویکسی نیشن مہم آن پد، دا ارٹ میکو مہم نا مسخت چناتے ودکی رکھ فراوان کننگ و پولیو دین ءِ تالان مننگ آن توننگ ئسک۔ اوپارے کہ ہراتم اسکان نن پاکستان آن پولیو ءِ چٹفپنہ، پنچ سال آن کم وئی نا چناتے دا موذی دین انا برخلاف قوت مدافعت ءِ ودفنگ کن واروار ویکسین کُنفنگ ءِ پک کننگ بھاز المی ءِ۔ چناتا دا موذی دین آن رکھ اکن مارچ اٹی اسہ پین مہم اس مریک و داسال پین مہم ہم مریک انتئے کہ ننے تینا چناتا رکھ ءِ پک کروئی ءِ۔ وزیر جان جوڑی مستی پارے کہ دا پاکستان اٹی پولیو نا چٹفنگ کن اسہ اہم ءُ سال اسے انتئے کہ ملک ءِ 2023اٹی پولیو دین نا گدریفنگ ءِ توننگ کن تینا جہانی عزم ءِ پورو کننگ نا گرج ءِ۔ فروری نا پولیو مہم اٹی کم وود 6.3 ملین چناتے رکھی ویکسین تننگا۔

(اے پی پی)