گوادر ءِ ایران آن بجلی فراوان نا بنا بروک آ تُو آن مریک
ایران آن گوادر سٹی ءِ 100 میگا واٹ بجلی فروانی کن نہاد پک کننگ کن ایرانی ڈَل گوادر ءِ سر مس
Get real time updates directly on you device, subscribe now.
گوادر: ایران آن گوادر سٹی ءِ 100میگاواٹ بجلی فراوان کننگ کن نرخ پک کننگ کن ایرانی ڈل گوادر آسر مس،کیسکو بلوچستان و این ڈی ٹی ڈی سی نا کمامدار آک ڈل ءِ بریفنگ تسر‘ حوال نا رد اٹ ایران آن گوادر سٹی ءِ اسہ میگاواٹ بجلی فراوان کننگ نا ڈٹ آخریکو مرحلہ ٹی ءِ‘ دا رد اٹ ایران نا پاور ڈویژن آن تعلقدار اسہ ڈل اس گوادر آ سرمس‘ کیسکو و این ڈی ٹی ڈی سی نا کمامدار آک ڈل ءِ بریفنگ تسر‘ حوالی نا رد اٹ ڈل کوئٹہ الیکٹرک سپلائی کمپنی (کیسکو) و نیشنل ٹرانسمیشن اینڈ ڈسپیچ کمپنی (این ٹی ڈی سی) نا افسر آتتون اُرائی و واپاری مسخت کن بجلی نا فی یونٹ نہاد نا معاہدہ نا بابت گپ وتران کرے و باندات آتے پک کننگا‘ پوسکن آ پروجیکٹ نا رد اٹ سیمی علاقہ کلاتو (پاک ایران سیم آن خڑک پاکستانی شار) آن جیونی گرڈا سٹیشن اسکان ڈبل سرکٹ 132 KV ٹرانسمیشن لائن جوڑ کننگ نا بابت پوسکن ءُ انفراسٹرکچر اس جوڑ کننگانے‘ جیونی گرڈ اسٹیشن آن گوادر گرڈ اسٹیشن اسکان ہچ مف 75 کلو میٹر مرغن ڈبل ٹرانسمیشن لائن کیہی سال مست تالان کننگانے و زوت ہندا ٹرانسمیشن لائن نا کمک اٹ گوادر سٹی ءِ بجلی تننگک۔ یات سلے کہ پنجگور آن خڑک پاک ایران سیم آن گوادر اسکان بجلی نا متکن آ پنجر مہالو آن ساڑی ءِ ہرا ہچ مف 40-70 میگاواٹ بجلی فراوان کیک ولے 400 کلومیٹر نا بھلا مُری و ایلو سوب آن گوادر ءِ آخبتی و سوگو بجلی فراوان کننگ مدام نزور مسکہ۔ گوادر سٹی نا الس پارینے کہ پوسکن آ ٹرانسمیشن لائن پاک ایران سیم کلاتو آن گبد ریمدان آن خڑک جیونی و گوادر اسکان ہندی مخلوق ءِ بجلی نا بھلا بند مننگ آن نجات ایتک و لوڈشیڈنگ ہم مفک۔ اوپارے کہ بجلی نا کمتی نا سوب آن گوادر نا کاروبار ہم سست ءِ ولے پوسکن آ ٹرانسمیشن لائن آن ہندی صنعت وواپاری شون ہلیک‘ کمامدار آتا رد اٹ ایران آن گوادر ءِ بروک آ تُو آن 100میگا واٹ بجلی تننگ نا باضابطہ بنا مریک۔
(آن لائن)